ZPM leader Lalduhoma’n inthlan boruak thlirin sorkarna siam ngei an inbeisei thu a sawi.
Thawhtanni khan ZPM chuan an pisa-ah chhung inkhawm an nei a. He huna thusawitu ZPM leader Lalduhoma chuan inthlan boruak thlirin sorkarna siam ngei an inbeisei tih sawiin, “Sorkarna kan siam a nih chuan party vote ni lovin ram mipui, neutral te leh Pathian vang a ni ang. Party sorkar ni lo, mipui sorkar din kan tumna kawngah min tawngtaisaktute leh kawng hrang hranga theihtawp chhuahtu zawng zawngte chungah lawmthu kan sawi,” a ti.
ZPM leader hian inthlan an hmachhawn zawh takah MPF awm leh awm lohna a dang hle tih sawiin, “Hmun thenkhatah MPF ngaihtheih lohna a awm nitein a lang bawk,” tiin, MPF chu inthlanna thianghlim leh felfai Mizoramin a neih theihna tura theihtawp chhuahtu; a neitu pawh Kohhran leh NGO zawng zawng bakah political party zawng zawngte an nih avangin pawl hrang daih anga ngaih tur an ni lo va, a neitu vek an nih thu a sawi.
Sorkar tha zawk nei turin mipui an tuihal nia a lan thu sawiin Lalduhoma chuan, “Kum naupang deuh, vote nei thar leh upa zawk thlengin vote thlak turin phur takin kan penchhuak tlang a, vote pawh a tla tha hle. Neutral-in vote an thlak that avangin heng mite hi kan ram tidamtu leh siamthatu an ni dawn,” a ti bawk.
Lalduhoma chuan kum nga chhungin party naupang ber leh sum lamah pawh pachhe berin inthlan hrang hrang – AMC, LMC, bye-election, VC/LC te an hmachhawn a, a hautak hle tih sawiin, “Heti chung hian result duhawm tak tak kan nei thei a, Pathian kaihruaina leh awmpuina kan dawng hle a ni. Kuminah MLA General Election kan hmachhawn leh a, kan result neih tur hi kan tawngtai chhannaah kan ngai dawn a ni,” tiin, ZPM chuan chunglamah thawhpuitu an nei a. Hnehna an chang a nih chuan ZPM party vang ni lovin, Pathian vang leh neutral mipuite vang a nih thu a sawi.
ZPM chhung inkhawm hi ZPM Vice President Dr Kenneth Chawngliana’n a kaihruai a ni.