Aizawl : MNF Sr. Vice President Tawnluia chuan MNF sorkar chu mipuiin an dem lova a hriat thu a sawi.
Thawhtannia Mizo Hnam Run chhung inkhawmah thu sawiin Tawnluia chuan, MNF sorkar hnuaiah hripui te, raltlan leh harsatna hrang hrang kara sorkar hmalakna chu a tha thawkhat tih a sawi a. “Hripui te, raltlan leh harsatna hrang hrang kara sorkar hmalakna chu a tha thawkhat a. Tunah hian tupawh lo sorkar se an thiltih leh an hnathawhah teh thin ni se. Sorkar kal tawhten engmah ti lo ang maia an sawi thin hi a tha lo. Political party-ten manifesto kan duante hi inteh nan hmang ila a duhawm hle ang,” a ti.
Deputy chief minister ni bawk Tawnluia chuan tunah hian an hmabak vote chhiar hunah, chak thei an ni a, chak lo thei an ni bawk tih a sawi a. Khawvela an awm chhungin dam lohna leh harsatna te, hlimna leh lawm chang te a awm angin eng pawh hmachhawn thiam tura inbuatsaih chu mi puitlingte tihdan a nih thu a sawi a. Kumin MLA inthlanpuiah hnehna an chang a nih pawhin chapona leh midangte deuna a awm thei a, MNF party chu puitling taka awm turin a chah.
MNF chu Laldenga awm loh hnuah Zoramthanga’n a kaihruai tih sawiin Tawnluia chuan, “Party chhungah vawi khat chu amah chotu vangin vote kan thlak a. Kha bak kha vote thlakin hruaitu kan thlang leh tawh ngai lo,” tiin, tun MNF sorkarah a kaihhruainaah pawh mipuiah anti-incumbency (sorkar lai thlak duhna) lian tak a awm lo chu a lawmawm tih a sawi a. Mizo nationalism keng nungtute hi mipuiten an kutah sorkarna an dah leh ngei dawn niin a sawi bawk.
Inkhawm hi MNF Adviser Dr ZR Thiamsanga, MLA in a kaihruai a ni.