Mizoram dep, Myanmar khaw chhung, Rihkhawdar leh a chheh vela mipui sipai tangrual, People Defence Forces (PDF) leh Myanmar sipaite inkahnaah mipui sipai mi pasarih bakah civil mi pakhat a thi.
The Zozam Times thu dawn danin Pathianni zan thimhlim atangin Khawmawi sipai camp leh Rih camp chu mipui sipaiten lak tumin bei tanin zankhuain silai leh bomb puak ri a chawl lo va, nimin zing dar 6 vel khan PDF hian Rih sipai camp an la a, hemi hnuah Khawmawi border sipai camp an bei leh a. He thu buatsaih a nih lai hian Khawmawi sipai camp-ah hian mi panga velin tan an la khawh a ni.
Sipai camp lak tuma an inkahnaah hian nimin chhun thleng khan mipui sipai hi mi 10 bawr velin hliam an tuar tawh a, hliam tuarte hi Zokhawthar Branch YMA-in an buaipui a. Hliam tuarte hi Mercy Clinic-ah enkawl niin, mi panga chu District Hospital, Champhai-ah hruai an ni.
Nimin khaw var hnuah Myanmar sipai lamin indo thlawhna leh helicopter thawh chhuahpuiin bomb hmangin mipui sipaite hi an bei zui a ni.
He thu buatsaih a nih thleng hian inbeihnaah mipui sipai lam mi pasarih an thi tawh a, hliam tuar mi 20 awm tawh bawkin, hliam tuar zinga na zual mi pasarih chu Aizawl panpui an nih thu dawn a ni.
Myanmar sipai lam thi zat erawh hriat theih a ni lo.
Myanmar sipai leh mipui sipaite an inkahna kaihhnawihah Myanmar atanga Zokhawthara hun eng emaw chen raltlana awm tawh, Chungthianmawia, kum 51 mi chu he inkahna avanga tun hnaia rawn raltlante chaw pe tura a kal chu Myanmar lam atanga silaimu lo kalin a mitah a fuh a, a nihna hmunah a hliam tuar lovin a thi nghal.
Chungthianmawia hi nimin chhun dar 1 khan Zokhawthar YMA Hall-ah vui nghal niin Zokhawthar thlanmualah phum a ni.
He inbeihna avang hian Rihkhawdar leh Khawmawi-a chengte chu Mizoramah an tlanchhe deuh vek a. Raltlante chaw eina tur nei lote tan Zokhawthar branch YMA ten an chaw ei tur an buatsaihsak a ni.
Sub-Hqrs., YMA (SYMA) Champhai pawhin mipui sipai leh Myanmar sipaite inkahna avanga hliam tuarte tan thisen eng emaw zat mamawh a nih dawn avangin YMA branch-ten thisen pekna routine-te thlir chungin Vengthlang, Zotlang, Vengsang branch YMA te chu nimin khan tlawmngai turin a ngen a. Heng bakah hian a tul angin la pun zel an tum bawk.