Aizawl : Mizo Zirlai Pawl (MZP) chuan tribal scholarship second installment la dawng lo zilaite’n an dawn thuai theihna’n vawiin zing dar 9 hian, Dawrpui Vengthara Mizoram Scholarship Office kawtah sit-in demonstration an nei dawn.
MZP Pisapui-a nimina MZP Extended OB thukhawm chuan, zirlai eng emaw zatin tribal scholarship second installment an dawn thuai theihnan Mizoram sorkar hnenah vawi tam tak an lo thlen tawh a, scholarship file pawh umzui a ni a. Mahse, tun thlenga zirlaite’n an chanvo an dawn tur scholarship an la dawn loh avangin Mizoram Scholarship Board office kawt, dawrpui vengtharah sit-in demonstration neih an rel a ni.
He hmalakna hian awmzia ala neih loh chuan, zirlaite’n an chanpual scholarship an dawn vat theih nan a tawp thleng hmalak zel a tum thu MZP chuan an sawi.
MZP-in thuchhuah an siama an tar lan danin, zirlaite scholarship second installment tang zat hi Rs nuai 1,787.48 a ni a. heng pawisate hi Mizoram sorkar kutah a luhna a rei tawh hle. Scholarship second installment pawisa la dawnglo hi zirlai 19,495 an awm a, Mizoram chhunga zirna in 36 atangin zirlai 5,023 bakah Pawl XI leh XII zirlai 11,462 leh Mizoram pawna awm zirlai mi 3,010 in an la dawng lo a ni.