Aizawl khawpui chhung, Bazar Bungkawn leh Bawngkawna khawl hmanga lirthei tlan dan enkawlna traffic signal light chu nimin atang khan hman chhin a ni.
Adaptive Traffic Control System (ATCS), traffic signal light hi nimin chawhma dar 11 atang khan Bazar Bungkawnah leh Bawngkawn, Sairang pengah hman tan a ni a, tlai dar 3 thleng enchhin tura ruahman ni mah se Bawngkawn bikah erawh lirthei a inhnawhkhawm nasat avangin darkar khat chuang hman chhin a nih hnuah tihtawp leh rih a ni a, Bazar Bungkawn bikah erawh tlai dar 3 thleng tluang taka enchhin a ni.
Traffic Police duty-te chuan lirthei khalhtuten signal light awmzia an la hriat chian tawk loh thu te, hei hian harsatna a siam tih an sawi a, tum khat enchhinna a nih angin duhthusam angin a la kal tluang rih lo a, hun rei zawk an kalpui hnuah erawh mipuite pawhin light en dan a zira tlan dan tur an hriat chian chhoh zel an beisei tih an sawi a ni.
Traffic Signal Light hi rawng sen a lo lan chuan lirthei tlan laite chu din tur a ni a, kawngpuia rawng vara rin ‘Stop’ tih inzaihnaah din tur a ni a, kea kal tan kawng a kân theih a. Rawng eng a lo lan chuan ding tura lo inhriattir lawkna niin tlang muanga ding tura inpuahchahan tura in hrilh lawkna niin, zawi muanga din tur a ni a; rawng hring a lan chuan lirthei dingte chu an tlan thei tihna a ni.
Nimina traffic signal light enchhinna ni khatnaah erawh heng rawng awmze neite hi lirthei khalhtuten an la hre tawk lo hle a, traffic police-te chu light awmna bulah duty-in lirthei khalhtute chu an lo hrilh hre zel a ni.