Manipur tual chhunga Zofate leh Meitei indona kal mek a, November 7, 2023-a Zofa lam a hmatawnga duty tur, 46th AR ten Mata khuaa an lo dan avanga mipui leh sipai innawrna thlenga sipai kut tuar hmeichhe pakhat chu a ke a chet theih loh avangin Aizawlah phurh a ni a. November 13, 2023 khan Civil Hospital, Aizawlah luhpui a ni.
Lamka atanga Mizoram lam, km 33-a awm Singngat khua atanga volunteer duty tura frontline pante chu 46th AR-in an lo tihbuai avangin a chhan turin mipui an thawk chhuak a. Hmeichhe eng emaw zah chuan sipaiin kut an thlak avangin hliam an tuar a ni.
Hliam tuar zinga pakhat, Thuamneihdim (Didim), kum 27, New Lamka chu a ke dinglam a chet theih loh bakah zun leh ek chungchanga harsatna tawh zui avangin Aizawlah enkawl tura phurh a ni a. Civil Hospital, Aizawlah enkawl mek a ni. Sipai kut tawrh avanga harsatna a tawh mek tih thuah lo chuan amah chu a harh tha a ni.