Spain midfielder hlui Cesc Fabregas chuan senior team football-ah manager hna a vawikhatna atan a thawk dawn a, Italy a Serie B club Como 1907 in interim manager atan an puang.
Kum 36 mi Arsenal, Chelsea leh Barcelona star hlui hian Moreno Longo a thlak dawn a, season liamta khan Serie B team tan hian vawi 17 a inkhel. Football khelh a chawlhsan hnuah an youth leh reserve team coach a ni mek.
Como chuan manager nghet ni tur puan theih thuai an tum thu an sawi a. Manager thlak chu an club tana kawng thar zawhna a ni a, fans te tana football hmuhnawm leh hmalam hun atana hun duhawm zawk a thlen theihna tur a nih an beisei thu an sawi.
Como hi league table-ah parukna niin match 12 atang point 21 an hmu mek a. Fabregas hian November 25-ah Feralpisalo hmachhawnin bul a tan ang.
Kum 2022 August khan AS Monaco a chhuahsan hnuah Como hi a zawm a, an club shareholder zingah a tel nghal bawk.
Como-ah hian Chelsea leh England midfielder thin Dennis Wise chu club president a ni mek.
Manager chhuak ta Moreno Longo hi beiseina sang tak nena lakluh nimahsela a hnuaiah match 45 an khelh chhungin vawi 16 chiah hnehna an chang.