Aizawl: Congress sorkara minister hlui, Lalbiakzuala chu nimin zing khan dar 4:25 khan cancer avangin kum 67 mi niin a thi.
Kum 1993-a 3rd Mizoram Legislative Assembly inthlanah khan Lalbiakzuala hi Congress party ticket-in Khawhai (ST) bial atanga thlan tlin a ni.
Ram rawngbawl hna a thawh chhungin Political Assistant to Chief Minister, Political Secretary to Chief Minister bakah Mizoram sorkarah Minister of State niin, Congress sorkar-ah Forest department te pawh lo enkawl tawh a. All India Congress Committee member a ni bawk.
Lalbiakzuala hi nimin chawhnu dar 1 khan an chenna, Chaltlang Ruamveng-ah vui a ni a. A nupui Lalhmingduhawmi leh a fate a kalsan a ni.