Mizoram Olympic Association chuan tun thla a Goa a neih zawh tak 37th National Games a medal latute lawmpuina hun a hmang.
Thawhtanni khan Aijal Club-ah he hun hi hman a ni a, MOA president Robert Romawia Royte chuan lawmpuina hun hi a hmanpui.
Medal late lawmpuina hunah hian Mizoram contingent Chef de Mission V. Lalzawmliana’n tun tum games a Mizoram report a pe a. Kumin National Games hi Mizoram in a tel tawh chin a result a la neih that ber tum a ni a. Gold medal pahnih leh silver medal pathum a la.
Heng medal lakte hi Mizoram contigents atanga infiammite tlingte atanga chhutin 35% a ni a. State leh Union Territory 36 inelnaah a pumpuiah Mizoram in 27-na a luah.
MOA president chuan, “ India rama inelna sang ber National Games qualify tam zawk an awm theihna turin Mizoten kan theihna zawn infiamna hi kan kal nat a hun tawh.” a ti a.
“Kumthar a Uttarakhand a 38th National Games lo awm turah MOA chuan National Games medal tam zawk kan lak theihna turin medal kan lak theihnate hi nasa lehzualin kan vulh tawh ang.” tiin a sawi bawk.