Aizawl: Lok Sabha MP C. Lalrosanga’n nimin khan Aizawl Muanna Venga Thutak Nunpuitu Team (TNT) a tlawh.
C. Lalrosanga chuan TNT hmunpuia nausen atanga puitling, pitar/putar thleng enkawl ngaite enkawl an nih dan leh an mamawhte a hmunah ngei hmuhpuiin, TNT-a rawngbawltute inpekna leh an hnathawhte ropui a tihzia thawktute chu a hrilh.
Pathian rinchhan a, rinna tak tak nena mi 1,800 lai harsatna leh mamawh chi hrang hrang nei an enkawl dan chu fakawm a tih thu a sawi bawk.
Lok Sabha MP hian TNT-a inenkawlna in leh hmunhmate chu enkawl ngaite enkawlna atan a chep tawh hle tih a hmuhin a theih ang tawka tanpui a tum thu a sawi a. TNT Kalvari Hospital De Addiction Centre tihlen dan ngaihtuahpui a tum thu a sawi bawk.
Lok Sabha MP hian TNT De addiction Centre tana MP Fund atanga lungrem siam hna a thawhtir chu tlawhin hnathawk tha a tih thu a sawi a. Kum 2016-a ama hova din, ‘Prayer for Myanmar’ pawl hmingin TNT puala chhawmdawlna programme chu kumin Krismas leh Kumthar inkarah buatsaih tum a nih thu a sawi.