Fast Track Court, Kolasib chuan Heroin gram 107 a rit neitu a puh, Lalthanthuami chu kum nga chhung lung in tang tur leh pawisa Rs 30,000 chawi turin a hrem.
August 11, 2020 khan Mamit police-te’n an thudawn bawhzuiin Aizawl atanga Kolasib service thin Sumo pakhatin Mamit panin ruihhlo phur nia an rinhlelh chu, Mamit police te chuan Mamit pengthuamah an lo chang a, zan dar 8:30 velah Sumo chu thleng mah se, Heroin neitu nia an thu dawnnain a sawi chu a tel ve loh avangin Sumo chu an chhuah a, a rukin an enzui thung.
Sumo chuan a tuk zing dar 3:30 bawr velah Koasib Venglaia HB counter-ah a thil phurh chu a hlangthla lai hmuh niin, hemi tuk vek zing dar 9 hnu lawkah Wai Wai bawm chhunga dah, heroin hawng 8 chu nu pakhat, a neitu ni ngei a hriat chuan HB counter-ah kalin a lak lai tak chu police-in an nang ching a, Lalthanthuami, Khuangpuilam, Kolasib chu an man ta a ni.
Kolasib Fast Track Court-a Judge, R. Vanlalena chuan thuhre tute thu sawi leh evidence dangte uluk taka a enfiah bakah, Ukil te thusawi chik taka a ngaihthlak hnuah heroin neituah puh, Lalthanthuami chu kum nga chhung lung in a tang tur leh pawisa pawh Rs. 30,000 chawi turin Thawhlehni kalta khan thutlukna a siam ta a ni.
Pawisa hi a chawi thei lo emaw, a chawi duh lo emaw anih chuan thla hnih dang lung in tang tura tih a ni.
Ruihhlo avanga Court-in thiam loh a chantir, jail a tang te hi an tan hun tur bithliahah hian eng dan hmang mahin remission pek ve theih an ni lo thung.