Aizawl: Manipur-a tribal-te intelkhawmna, Indigenous Tribal Leaders’ Forum (ITLF) huaihawtin nimin khan Lamka district-ah Kuki Zohnahthlakte chunga nunrawnna rapthlak tak duh lohna kawngzawh a ni.
Kawng zawh hi Lamka district-a hmun thum – Kawnpui Public Ground, Mualvaiphei Public Ground leh Pearsomun Public Ground atanga tanin Tuibuang Peace Ground, Deputy Commissioner office bulah an intawkhawm a, state sorkar an demna thu leh Meitei hovin tribal-te chunga nunrawnna an lantirte chu investigating agency-ten chhui turin an phut thute an aupui.
Manipur-a Zofa pawl hrang hrang khaikhawmtu, Zo United leh ILTF chuan a hran ve ve a thuchhuah siamin Manipur sorkar chu an tual chhung buaina a hmachhawn danah hleih neia cheah puhin, buaina a chhuah atanga thla ruk ral hnuah pawh Meitei kut tuar tribal-te dikna chanvo chu haider luihsak tlat an ni tih an sawi.
Buaina chhuak mekah Zo hnahthlakte thil dik lo tia puh an nihna chungchang chu police leh central agency – CBI leh NIA ten bawhzuiin, hma an la vat tih tih sawiin, thil ti suala puhte man vat an ni tih an sawi a; hetihlai hian tribal-te tawrhna lam erawh ngaihthah a ni a, hetianga sorkarin justice system-a hleih a nei chu an dem tak meuh tih an sawi.
Meitei-ten Hmar tlangval, David Thiek-a lu an tan chungchangah CBI-in thil tisualtu an man theih tlat loh laiin Meitei thalai pahnih bo chungchang chu rang taka chhuiin an rinhlelh chu an man nghal a, heta tang pawh hian an ngaih pawimawh zawng chu a chiang hle a ni tih an tar lang.
ITLF leh Zo united chuan Kuki-Zo hmeichhia pahnih saruaka khawlaia chaih a, pakhat chu pawngsual rawn a nih chungchang leh Zo hnahthlakte tawrhna hrang hrangte chu chhui zui mumal a ni lo tih sawiin, Manipur sorkar chu Meitei-te tan lutukah puhin, tun hnaia Moreh-a thil thleng, Zohnahthlahte tawrhna hrang hrang an tar lang bawk.