- Ruata
Tunlai hian Mahindra company in an lifestyle offroader lar Thar thar an lo tihchhuah tur, 5-door version chu a enchhinna hmawr an bawk tan a, India ram khawpui kawngpui thenkhatah pawh hmuh tur a awm ngun ta viau a ni.
Mahindra Thar thar tur hi nakum kum laihawlah an tihchhuah hman beisei a ni a. A nihna leh landan tur thupna tur atana an tuam bur, camouflage-a thup chu kawngpui hrang hranga enchhin lai hmuh tur a awm nual a. A landan tur tam tak erawh a lang thei ruak a ni.
A design hi tuna chhuak mek 3-door Mahindra Thar nen a inang deuh reng ang a, chutihrualin Thar.e concept design zula duan a nih a beiseiawm bawk a. Thar.e concept hi kumin August ni 15 khan South Africa-ah an lo phochhuak tawh a. Hei hi a hming kan hmuh ang hian electric hmang Mahindra Thar tur a ni thung a, hei erawh hi chu kan la hmuh har deuh hmel a ni.
A thlalak leh video darh mek atanga a lan danin Mahindra Thar 5-door tur hian projector headlamp thar a neih hmel a, hei bakah hian grille thar, LED DRL design thar hlak bakah sunroof te pawh a nei dawn a ni.
5-door version Mahindra Thar lo chhuak tura thil chiang sa chu a lirthei dung hi a sei hret tawh dawn a ni a. A hnunga thute tan kawngka thar a awm bakah hian bungraw phurhna hmunawl zau tha pangngai tak a awm dawn a. A lawnkaina, side step lian zawk, alloy wheel design thar leh a hnung LED taillamp thar te pawh kan hmuh hmel a. Hei bakah hian infotainment screen lian zawk, rear parking camera, a hmalam armrest leh centre console design thar kan hmuh hmel bawk a ni.
5-door Thar hian 2.0L turbo petrol leh 2.2L turbo diesel khawl te a hman hmel a. Petrol zawk hian 200bhp power leh 370Nm/380Nm torque a pechhuak thei ang a, diesel zawk hi chi hnih 172bhp power leh 370Nm/400Nm torque pechhuak thei leh 130bhp power leh 300Nm torque pechhuak thei te a awm dawn bawk a ni. Gearbox thar chi hnih – 6-speed manual leh 6-speed automatic te duhthlan tur a awm ang a. 4X4 leh 4X2 drivetrain systems te duhthlan theihin a awm hmel bawk a ni.
Reiloteah Mahindra Thar thar hi a chanchin kimchang leh nih phung tur chiang zawk kan hre chho thuai tawh ang a. Tuna chhuak mek Thar aia lian hret offroader SUV tha tak duh tan chuan nghahhlelhawm tak tur a ni a, nakum erawh la nghah hram a la ngai dawn a ni.