Aizawl: Mara rama Sap Missionary hnuhnung ber leh dam rei ber ni bawk Rev. Violet Louise Anne Mark (Pi Vaili) chu nimin khan Saikao (Serkawr)-a Missionary Thlan-ah ropui taka vui liam a ni.
Rev. Violet thlahna hnuhnung leh vuina hi Saikao Mission Compound kawtah chhawng hniha buatsaih a ni a, a thlahna programme hi chawhma dar 10:30-ah tanin, Rev. Z. Hrohmo, Exe Secy. Congregational Church of India, Maraland (CCI-M)-in kaihruaiin, kohhran leh pawl hrang hrangin thlahna thuchah sawiin, pangpar hlanna an nei a. Siaha khawpui leh khual khua atangin thalai rual za tam takin ‘Halleluiah Chorus’ remin an thlah bawk.
Chhun dar 12:30-ah vuina hun hman tan niin, Rev. Moderator Elect, Evangelical Church of Maraland (ECM)-in a kaihruai a. He hunah hian Rev. Salaw, Sr. Exe. Decy ECM; Rev. Beirakaw, GS, CCI (M); Rev. A Rakhai, ES (Mission), MEC, Myanmar; M. Laikaw, CEM, MADC leh chhungkaw aiawhin a pasal, Rev. L. Mark-a ten thuchah an sawi.
Rev. Phosa Chozah, Moderator, ECM Assembly-in vuina neiin, ECM leh CCI(M) zaipawl te nen vuiliam a ni.
Mara rama chanchin tha meichher lo chhitu, Rev. Reginald Arthur Lorrain thlah, an tunu la dam awmchhun, Rev. Violet chu an rawngbawlna hmun ngei, Mara ramah a lu phum vein, Rev. R.A.Lorrain thlah zinga Mara rama luphum zinga a pangana a ni.
Mara rama sap Missionary dam rei ber, Rev. Violet hi November 14, 2023 zing dar 8:10 khan a chenna in, Saikao (Serkawr)-ah, kum 85 mi niin a thi a. Rev Voilet hian a pasal Rev. L. Mark leh a fate pali bakah a tute a kalsan.
ECM chuan Saikao-a Rev. Violet thlahna tel ve theilo te tan Kohhran tinah, nimin chhun dar 12 khan mahni biak in theuhah a sunna hun an hmang vek bawk a, CCI (M) leh kohhran dangte pawh Rev. Violet sunna hmang an awm bawk.
MADC chuan Rev. Violet sunna atan ni thum chhung MADC pisa leh CEM bungalow-ah te a ngul chanvein hnam puanzar an zar a. A ruang vui ni, nimin kha MADC pisa leh a hnuaia zirna in zawng zawng te khar a ni bawk.
Rev Violet hi ni sarih chhung MADC area-ah intihlimna lam, sports leh thil dangte ti lo turin thuchhuah a siam bawk a, Siaha a dawrkai leh Chawhmeh Zuar Association te pawhin sun nan dawr an khar vek.
Saikao-a Rev Violet vuina neihah hian Siaha khawpui leh khaw hrang hrang atangin mi sang tel an pungkhawm a. Sun tura khaw hrang hrang kohhran hming thilpek, ei leh tur an thawh nasa hle a, Sial leh vawk pawh an thawhkhawm hial a ni.
Rev. Violet hi Rev. AB Foxall leh Louise Marquerite Tlosai Lorrain te fanu neihchhun a ni a, Mara ram leilung Saikao khua ah April 6, 1938 khan a piang a. December 11, 1968-ah Mara tlangval hmetha, Saikao khaw mi Rev. L. Mark nen inneiin, Rev. A.B. Lorrain Foxall an kut a suih a ni.
Rev Violet hian a dam laiin thil tam tak, a nunah leh thil tihah hnutchhiah neiin, a duh ber chu ECM leh CCI (M) kohhran inpumkhatna a ni a. Heng kohhran pahnih te hian Assembly-ah inremna hi pawm tawh mah se, a taka inremna hi a la awm lo va, hei hi a ruang chungah pawh sawi uar ber a ni.
Rev Violet uina leh sunna thu hi London leh khawvel hmuh dang kohhrante bakah, Mizoram a kohhran hrang hrang te leh ram hruaitu, party hruaitu hrang hrang ten an siam bawk.
MNF-in Pi Vaili sun
AZL: MNF party chuan Mizorama chanchin tha meichher chhitu zinga mi, Rev Violet Louise Annie Mary (Mizoten Pi Viali an tih mai) chu thinlung taka an sun thu an sawi.
Nimina ropui taka Serkawr (Saikao)-a vui liam tak, Rev. Violet chu Mizoram chhung, Mara chenna hmuna sap Missionary lut hmasa ber, kum 1977-a an mission a tawp hnuah pawh an ram lama haw duh lo a, Mizoramah Lal Isua chanchin tha hril chhunzawm zel a, a hun tawp a hmang hi Zofate thinlungah a dai ngai tawh lo ang a. Hei vang hian Pi Vaili chu ngaihsanawm an tih thu leh an ngaihhlut thu an sawi a. Rev Violet hnathawh a ropui tiin, thinlung taka a sun thu an sawi a ni.