Aizawl : Serchhip Bawrhsap David Laltha- ntluanga hovin Serchhip khawpui chhunga veng fai lawmman nimin khan sem a ni a. Lawmman pakhatna dawngtu Vengchung Village Council an ni.
Bawrhsap chuan Sw- achta hi Seva hman chhungin faina lamah mipui leh sorkar an luangchhuaka, faina beihpui an thlaka, hei hi faina hapta hman hun chhung chauh ni lo, kum leh khuaa kalphung ni se a duh thu a sawi a. Fai inelna tha taka kalpui niin, MJA ten tlawmngaih chhuahin a endik hna an thawk tih sawiin, lawmman la thei tur khawpa hmalatute zawng zawng chungah lawmthu a sawi.
Serchhip Bawrhsap chuan “Mizoram chu state dang ngaihtuahin kan fai viau a, amaherawhchu, hmabak erawh kan la ngah hle” tiin, tan la thar turin kalkhawm te a fuih a. Serchhip chu khawpui fai tak, bawlhhlawh hmuh tur pawh awm mang lo khawpa fai nia sawiin, khawtlang hruaitu VC te leh tlawmngai pawl te, mipui te fakawm a tih thu a sawi.
“Tifaituah kan tang thei lo a nih pawhin tibawlhhlawhtuah tumah hi tang lo ila” Bawrhsap chuan a ti a. “Kan khawtlang leh kan in leh a vel te a lo faiin a lo thianghlim leh zual thei ang” tiin Serchhip Bawrhsap chuan khawtlang mipuite a chah.
Swachhata hi Seva hi India ram pumah September ni 15 atanga October ni 2, Mahatma Gandhi piancham thleng khan hman a ni a. Thupuiah Garbage free India – bawlhhlawh awm lohna India tih chu thlan a ni. Serchhip ah pawh UD&PA hmala- kna in faina beihpui thlak a ni a. He hapta hnih chhung hian Sesah kawr tihfai hna chu Govt. Serchhip College NSS ten an thawk a; DAY-NULM hnuaia SHG ten Serchhip khawpui chhunga vantlang inthiarna zawng zawng an tifai a; Brilliant Hr.Sec.School leh Presbyterian English School, New Serchhip ah te hman khat daih plastic hmang lo tur leh bawhhlawh thliar tura inzirtirna kalpui a ni a; Swachhata hi Seva pualin, Mizoram Cleanliness Week inbuatsaih nan Serchhip Town Area chhunga VC hrang hrangte tan fai inelna buatsaih a ni.
Serchhip MJA ten October ni 5 leh ni 6 khan a endik hna an thawk a. VC lawmman dawngtute chu : Pakhatna – Ven- gchung VC (Rs. 20,000 leh citation) Pahnihna – Chanmari VC (Rs. 10,000 leh citation) Pathumna – Hmar Veng VC leh P&E Veng VC (Rs. 5000 leh citation)