Sorkarin zirlaite hnena scholarship second installment a pek chhuah har avanga lungawi lohna an lantir mek chu MZP-in nimin khan chhunzawmin, Mizoram Scholarship Board (MSB) office kawtah an pungkhawm leh a, vawiinah thawktute pisa kai tur an dang leh dawn.
MZP huaihawtin Thawhlehni atang khan zirlaite chuan scholarship pek chhuah har avanga lungawi lohna lantir nan leh pek chhuah vat phutin MSB office kawtah hian an pungkhawm a, an thil phut a hlawhtlin loh avangin niminah chhunzawmin, vawiinah pawh lungawi lohna lantir chhunzawmin MSB-a thawkte office kal tur dan an tum a ni.
Nimina lungawi lohna an lantirnaah hian MZP President H Lalthianghlima chuan thu sawiin, scholarship board chu an tih tur ti tawk loah puhin, screening Committee vawi li an thut hnuah, a vawi linaah chauh scholarship chungchang ngaihtuah a ni chu scholarship hotute inthlahdah vangah an ngai tih a sawi.
MZP president chuan September 25, 2023 khan scholarship second installment tur pawisa chu Mizoram sorkarin a dawng tawh a, rei tak bawhzui lohin a awm a, MSB secretary leh under secretary te hian an tih tur an ti tawk lo nia a hriat thu a sawi a, “Scholarship sum chu September 25 khan Mizoram sum bawmah a lut a, November 3 thleng hun kan pe a, November 3 hma zawng khan scholarship file hi a che lo reng reng a, a awm tawp mai,” a ti a, zirlaite an ngaihthah hle tih a sawi.
MZP hruaitute chuan nimin chawhnu khan Chief Secretary Dr Renu Sharma chu a pisaah hmuin zirlaite harsatna leh scholarship pek chhuah vat a tul thu an sawipui a, Thawhlehni khan MZP chuan Mizoram Joint Chief Electoral Officer (Joint CEO) hmuin zirlaite scholarship pekchhuah vat a tul thu an lo sawipui tawh a, Chief Election Commissioner of India hnenah pawh zirlaite scholarship pek chhuah phalna pe vat turin ngenna lehkha email hmangin a thawn tawh a ni.