India in ICC Men’s Cricket World Cup 2023 final lut

Indian cricket team in ICC Men’s Cricket World Cup 2023 final an lut a, semi-final inkhelah New Zealand lakah hnehna tha changin run 70 in an chak.

Nilaini zana Mumbai a Wankhede Stadium a inkhelah hian India superstar Virat Kohli chuan record thar a siam a. Bowler Mohammed Shami chu hnehna an chan theih chhan pawimawh ni bawkin India tana ODI a bowler match khat a wicket la hnem record a siam.

  • India ropui zan

India in run siam tam theihna mualah vuak an thlang a, over 50 chhungin wicket 4 hlohin run 397 an siam.

India tan Virat Kohli chuan ball 113 atang run 117 a siam a. ODI century a siam vawi 50-na niin cricket legend Sachin Tendulkar-a record a khum.

New Zealand erawhin an khingpuite bat hmangin che tha hle mahse hnual mai bik an tum hauh lo. Daryl Mitchell chuan century tha tak siam ve in an ram khaidingtu a ni a. Captain Kane Williamson nen an inkawp laiin ball 149 hmachhawn dunin run 181 an siam a. Chak inbeisei ngamin Kiwis an awm hman.

India tan bowler Mohammed Shami a hun takah a inlar. Williamson-a wicket pawimawh a lak hnuah Tom Latham a chhuahtir leh zui a. Mitchell wicket chu la leh bawkin Kiwis in a tawp an khar tha thei lo.

Shami hian wicket 7 la in run 57 a pe a, India tana in ODI a bowling figure nei tha ber a ni a. New Zealand run 327 siam a an out zawh theih chhan a ni.

India tan ball 70 atanga run 105 siamtu Shreyas Iyer pawhin fak a phu.

India in kum 2011 hnua a vawikhatna atan mahni mualah World Cup title chawi an tum a. Pathianni zanah nizan a Australia leh South Africa inkhel a chak zawk an hmuak.

India captain Rohit Sharma chuan, “Helai hmunah ka inkhelh hnem tawh avangin run eng anga tam pawh siam ila kan dinhmun a him ngai lo tih ka hria. An bat tha a, kan chiai lo kha hnehna kan channa a ni.” a ti.

Leave a Reply

error: Content is protected !!