Dan zam zawm famkim lova hawn naupang enkawlna leh zirna, child care institutions (CCI) chu uluk lehzuala dan hnuaia endik a nih hnuah ram pumah hetiang in 539 zet hi khar a ni a, Maharashtra-ah kharsak hi an tam ber.
Ministry of women & child-in hma a laknaah dan zawm lo bakah Juvenile Justice Act, 2015-in a phut anga state sorkara inziak lut lote chu an kharsak chhan lian pahnih a ni.
Home kharsak 539 zinga 377 zet chu Maharashtra-a mi a ni a, Andhra Pradesh-ah 78 leh Telangana-ah 32 kharsak an ni bawk a. Deoria hmuna naupang enkawlnain chanchin a ngah em em laiin Uttar Pradesh-ah chuan dan zawm tha lo kharsak hi home 20 chiah a awm thung.
Supreme Court chuan December 31, 2017 thleng CCI-te hi sorkara inziak luhna hun pe a. WCD ministry pawhin a theih ang angin inziak lut turin a hriattir nawn (remind) bawk a. Hetiang a nih mek laiin Bihar-a Muzzafarpur leh Deoria-a home-a thil dik lo tak thleng hmuh chhuah a ni a, WCD ministry hian dan zawm tha lote kharsak tur hian hma a la zui ta a ni.
Muzaffarpur leh Deoria-a CCI-ah thil duhawm lo tak a thleng tih hmuhchhuah a nih hnuah WCD ministry chuan National Commission for Protection of Child Rights (NCPCR) chu CCI zawng zawngte social audit nei vek turin a ti.
CCI-te hi sorkarah, dan hnuaiah inziak lut vek turin a ti a, he thil thlen hnu thla hnih chhung hun a pe.