US-Canada ramri leia car chak taka tlan chesuala puak zui leh kangmei nasa tak siamtu chu Thanksgiving thlen dawna an ram tiralkhel theia ngaih ni mah se firfiak chetna a ni lo tih an sawi.
Lirthei chesualah hian mi pahnih an thi a, US border agent-in hliam a tuar a; mahse, New York governor chuan firfiaka chetna a ni lo tih a sawi.
Car hi New York lam atanga tlan niin Rainbow Bridge a thlen hian checkpoint a su a ni.
Niagara Falls bul lawka chetsualna thleng avang hian khawvela ramri lei sei bera lei pali chu khar a ni.
He thil hi Nilaini chawhma dar 11:30 (India-a zan dar 10:30) vela thleng a ni a, US-a mi zin veivak an tam ber hun lai, Thanksgiving chawlh hma lawk a nih avangin lirthei kal vel a buai phah hle.
New York leh Canada inkara rel tlan pawh tihdin niin Buffalo leh Niagara Falls thlawhna tumhmuna officer-te pawh inralring tur leh lirtheite chu puak thei an phurh leh phurh loh endik uluk lehzual tura tih nghal an ni.
Thil thleng hi mi firfiak tih a nih hlauhna a nasa hman hle a, online lamah pawh thu chiang awm si lovin New York City-a Macy’s Thanksgiving Day Parade beih tumna a awm tih thlengin thehdarh a ni.
Massachusetts-a Thanksgiving hman tum, US President Joe Biden Canada Prime Minister Justin Trudeau te pawhin thil thleng hi a hran ve vein an sawi zui bawk.
Trudeau-a hian House of Commons-ah Question Period chu a awm duh lo va, a sorkar chuan thil thleng hi ‘a ngai thu tak tak zet’ tih erawh a sawi.
Inralrinna atan thuneitute chuan Ontario leh New York leh ram pahniha Niagara Falls ve ve tlawhna theihna lei, Rainbow Bridge-a Canada luh kaina lai chu truck hmangin an dang nghal bawk.
Darkar eng emaw zat hnuah New York Governor Kathy Hochul chuan, “Tuna kan hriat theih chinah chuan he tawhsual tawhnaah hian firfiakte chetna a awm lo,” tia thuthar lakhawmtute hnena a sawi hnuah boruak a ziaawm leh ta chauh a ni.
Thi zinga pakhat chu New York huam chhung khawthlang lama tual chhung mi a nih thu a sawi bawk.
Thi pahnih hi nupa an ni a, a mipa zawkin a khalh niin US law enforcement official-te chuan an sawi.
CNN chuan an car hi 2022 Bentley a ni a, Canada-a hard rock band Kiss concert chhim an tum an thulh leh avangin US casino-a kal tum an nih thu a tar lang.
Governor chuan car ‘chak takin a tlan’ niin a sawi a, kawng hungna feet 8-a sangah a inbang liam niin a sawi bawk.
A kang zui vak a, a engine tih loh a bang zui lo niin a sawi a, registration plate pawh an hmu zo lo.
Governor Hochul chuan tawhsual an tawh dan chu ‘a tak a ang lo hial’ nia sawiin ‘AI hmanga siam chawp’ a ang mah zawk niin a sawi.
Hliam tuar pakhat pawh hi a ngaihtuahawm lo va, US Customs & Border Protection (CBP) officer a nih thu a sawi.
Governor hian kawngpui lun laia thil thlengah thi leh hliam an tam lo chu a vanneihthlak tih a sawi.
Rainbow Bridge hi Nilaini zan (India-a Ningani tuk) thleng khar zui a ni a, hetih lai hian US-Canada kalpawhna pathum – Peace Bridge, Lewiston-Queenston Bridge leh Whirlpool erawh hawn a ni tawh.