Tualchhung football inelna sang lamah boruak a sang tial tial a, inkhel hmuhnawm karah league boruak a ngaihnawm telh telh.
Zirtawpni-ah Zote Toyota Mizoram Premier League Season 10 round 10-na khelh tan a ni a. League hmahruaitu ni chunga bul tan Chanmari FC leh Aizawl FC inkhelin 2-0 in I-League khel Aizawl FC an chak.
- Hnehna pawimawh
I-League club Aizawl FC in tualchhung player tha an kawl hnem, an damkim chuan team tha fal tak an ni. Chutihlaiin I-League an khel tan tawh a, Phase 2 bikah an tan chetsual fo a thiang tawh lo.
Chanmari FC pawh player tha kawl an ni a, league ah la tlawm lova round 9 thleng kal an ni.
Aizawl FC in tun season a tlarhma a an chhuanvawr Lalrinzuala hmangin minute 19-naah goal an khung a. Hma an hruai nghal.
Second half-ah Lalmawizuala own goal atangin goal an neih belh bawk.
Aizawl FC hi karleh atang ni 14 chhunga I-League away match vawi li khel tur an ni a. Hei vang hian an mamawh result tha an nei.
- Hmahruaitu Police
Champion lai Chawnpui FC leh Mizoram Police te chawhnu lamah an inkhel a. Team tha, coach fing pahnih hnuaia awmte inkhelah Police in 2-1 in hnehna an chang.
Police in an player pawimawh Malsawmfela bul an tan tir a, minute 2-naah goal a khung nghal. Hei hi minute 11-naah Chawnpui in Lalruatfela hmangin an sut.
Minute 30-naah Police midfielder R. Malsawmtluanga’n an chakna goal a khung a. Police in point thum an hmuh avangin point 19 hmu in table chung ber an luah.