RJD hruaitu, Tejashwi Yadav chuan Congress president Rahul Gandhi chuan prime minister tha tak ni turin theihna a neih thu sawiin BJP-in a tihchhiat tumin nasa takin bei mah se mipuiah a tla na hle tih a sawi.
Kumin Lok Sabha inthlanpui lo awm turah eptu party hrang hrang intelkhawm chuan BJP kaihhruai paihthlak tumin an bei nasa a, tling ta se, an prime minister tur erawh a la chiang thei lo va, Gandhi hming hi a langsar pawl a ni a; mahse, Tejashwi chuan prime minister tur chu inthlan zawhah grand alliance member-ten a huhovin an thlang dawn tih a sawi.
Gandhi-a chungchang an zawhnaah Rashtriya Janata Dal hruaitu chuan, “A chhe zawngin an campaign nasa em em chungin a dawhtheihna, a ngilneihna leh a rilru lian tak hian mite thinlung a hneh a ni,” a ti.
Tejashwi chuan tun hnaia state lian pathum – Rajasthan, Chhattisgarh leh Madhya Pradesh-ah Gandhi kaihhruaiin Congress-in inthlanah hnehna an chang a, hei hi a kaihhruai a rintlak chhan a nih thu a sawi a. “Kum 2014-a Narendra Modi vote-tu 69% chuan an vote tawh,” a ti.
Gandhi chu prime minister tha ni turin theihna a nei em tia an zawh chuan Bihar deputy chief minister hlui chuan, “Aw! Thatna a nei a, India rama party upa ber president a ni a, Parliament member kum 15 chhung a ni tawh a, a party hian chief minister panga a nei a ni.