Aizawl: Mizoram State Livelihood Mission (MzSRLM) Serchhip RD Block hnuaia Vantawng Cluster Level Federation hmalaknain nimin khan food court changtlung chu Thenzawl Hermon Vengah Serchhip District DRDO Project Director H.D. Lalpekmawia’n a hawng.
Food Court hi khualzinte tana chaw leh ei tur chi hrang hrang, Mizo duhzawng leh khawvel ramdang leh India rama hnam hrang hrang chaw leh eitur siam theihna a ni.
Hawnna inkhawmah khuallian H.D. Lalpekmawia chuan thu sawiin, khualzinmi te tana hetiang hmun Thenzawla din a ni ta chu lawmawm a tih thu leh hemi atana rilru leh tha leh zung thawhtute chungah lawmthu a sawi a, tangkai taka Mizoram mipui, zin vei vak te leh state dang leh ram dang atanga khualzin te pawhin an hman a beisei thu a sawi.
Serchhip district DRDO Project Director hian MARY SHG, North Vanlaiphai ten sunhlu, dragon fruit, kawlthei, balhla, theiherawt, serthlum, khawmhma leh lakhuihthei atanga Thei tui (Beer) leh Sunhlu Candy an siam chhuah bakah, Chekawn SHG ten Zopui Lemon Squash an siam chhuah te mipui lei theih turin a tlangzarh nghal bawk.
Vantawng CLF President Ramthianghlima kaihhruai hawnna inkhawmah hian Vantawng CLF Secretary Ngurhmingliani, State Project Coordinator, KS-NRO Anirban, Serchhip District DRDO DFS Vanlalmuanpuia, APD Stephen Auhmun, Serchhip Block BMM Zodinsanga, Vantawng CLF CC Vanlalruata Tochhawng leh Thenzawl VC aiawhin Zothani ten thu an sawi.
He huna thusawitute hian, Mizorama khualzin ten an tlawh nasat Thenzawl a hetianga chaw leh eitur chi hrang, Mizo chauh ni lo, hnam dang duhzawng pawh siamna hmun changtlung tak Self Help Group te hmalaknaa buatsaih a ni chu lawmawm an tih thu leh Mizo te khualchawn, customer care lamah tan an lak a tul thu uar takin an sawi hlawm.
Vantawng CLF enkawl Food Court a thawktute hnenah hian MzSRLM Sub-Scheme pakhat, SVEP hmalaknain Kereal atanga eisiam zirtirtu chah chhuah ten chaw leh eitur chi hrang hrang siam dan zirtirna (training) an lo pe tawh a ni.
Vantawng CLF hnuaiah hian Self Help Group 179 awmin, member 1200 chuang an awm mek bawk.