Fulham in huntawp dawnah penalty atangin goal an khung a, he goal hi an chakna niin video assistant referee bawkin sawi a hlawh lehna inkhelah 3-2 in Wolverhampton Wanderers an hneh.
Thawhtanni zana Premier League inkhelah Fulham in Craven Cottage ah Wolves an mikhual a. He inkhelah hian penalty vawi thum pet niin VAR hman a ni langsar.
Goal hnih ve ve nei a an inhnehtawk laiin huntawp dawn hun pekbelh an khel tawh tihin referee Michael Salisbury chuan Harry Wilson leh Joao Gomez te ball inchuh chu a enliam zet hnuah VAR lamin pitchside monitor-ah endik turin an ti a. Fulham penalty pe in Willian-a’n goal-ah a khung zui.
Inkhel tan atanga minute 7-naah Alex Iwobi chuan Fulham tan goal khung hmasa in Wolves goalkeeper Jose Sa kap karah Antonee Robinson ball pet chu a pet lut.
Minute 22-naah Matheus Cunha chuan Wolves si phurh a sut a, Jean-Ricner Bellegarde cross a tauh lut.
Second half-ah Fulham penalty hmuh hmasak zawk atang Willian chuan goal khung lehin Wolves lamin Hwang Hee-chan hmangin an hlawhchhuak ve leh a. South Korean winger hian an si phurh sutna ni turin goal-ah a khung ve leh a ni.
Wolves manager Gary O’Neil chuan inkhel zawhah VAR a sawisel nasa a. “VAR vangin kan chak lo. An thil endan a danglam reng leh thutlukna a inang thei lo hi hriatthiam theih a ni lo.”
“Penalty pakhat an pek laiin penalty chiang tak dang an pe lova. VAR ni lovin referee pangngai ni zawk se thil a danglam mahna. VAR hian inkhel a tha zawngin a nghawng lo. A sawisel pawlah ka tang duh ngai lova, mahse zanin atang chuan ka ngaihdan a danglam tawh.” a ti.