UEFA Champions League Group E atangin round of 16 khel tura tling thei pathum la awmin bul tan nimahsela Atletico Madrid leh Lazio ten hnehna changin last 16 an lut.
Spanish club Atletico in Thawhlehni zanah Stadion Feijenoord-ah tlin la inbeisei ngam Feyenoord Rotterdam an hmachhawn a, own goal vawi hnih an neih zanah 3-1 in an chak.
Minute 14-naah Feyenoord defender Lutsharel Geertruida chuan Marcos Llorente ball cross tumahin an tauh chhuah loh chu a ke in an goal-ah a dang lut palh.
Second half-ah Mario Hermoso chuan an goal hnihna mawi takin a khung belh a. Feyenoord in Mats Wieffer hmangin goal khat tauh lut ve mahse Santiago Giménez chuan an lama a tih luh ve leh avangin Rojiblancos an chak chiang.
Atletico coach Diego Simeone chuan, “Goal nawrah kan felfai a, goal ven kawngah kan thawkho tha hle bawk. Kan inkhel kha a lungawithlak hle. Kan khingpuiten inkhelh an tih harsat theihzia ngaihtuah tel chuan kan kheltha hle a ni.” a ti.
Feyenoord hi inkhel lehlamah Lazio in Celtic 2-0 a an hneh avangin Europa League khel turin an tling chiang ve tawh thung.
Stadio Olimpico-ah Lazio captain Ciro Immobile chuan second half a dah luh a nih hnuah minute 82-na leh 85-naah goal a khung a. 2-0 in hnehna an chang.
“Bench-ah inkhel thlak danglam thei neih ka duh a, Immobile hahchawlhna hun pek ka duh a, mamawh a nih huna danglamna siamtu nise ka duh. Kan mamawh hun a thleng ta reng a ni.” tiin Maurizio Sarri-a’n a thutlukna a sawifiah.