Real Madrid in match nga an khelh atang hnehna an chang vek a, Italy champion Napoli lakah 4-2 in hnehna an chang.
Santiago Bernabéu a inkhelah hian Real Madrid tan nipui laia lakluh Jude Bellingham chuan a chetthat a chhunzawm a. Real Madrid tana UEFA Champions League-ah a match khelh hmasak pali atanga goal khung vek thei awmchhun a ni.
England midfielder hian minute 22-naah David Alaba ball cross chu a tauh lut a, kum 20 mi hian tun season-ah vawi 16 inkhel tawhin goal 15 a khung tawh.
Huntawp hma deuha Joselu goal khung tur a siamsak leh bawk.
Napoli tan Giovanni Simeone chuan minute 9-naah goal a khung hmasa a, hei hi Rodrygo chuan minute hnih hnu lekah Real tan a sut.
Bellingham-a’n goal a khung hnuah Napoli tan Andre-Frank Zambo Anguissa chuan goal a khung ve leh bawk a. Second half-ah Real Madrid tan rawlthar Nico Paz chuan an goal thumna khungin Joselu-a’n goal hnuhnung ber a khung.
Real manager Carlo Ancelotti chuuan, “Tuman hetiang em em a team ah a pawimawh nghal kan beisei lova, fans leh kei bakah a teammate te pawhin mak an ti.” tiin Bellingham chu inkhel zawhah a fak.