Premier League club-te Europa League lamah an chetthat chhunzawm zel a, Liverpool in an group hmahruaitu ni chungin round of 16 an khel dawn.
Anfield a Ningani zana inkhelah Reds in LASK Linz an mikhual a. 4-0 in an hneh.
Liverpool in first half-ah Luis Diaz leh Cody Gakpo te hmangin minute 12-na leh 15-naah goal an khung a. An goal hmasa ber khung tura Diaz leh Joe Gomez ten ball inpe a tlarhnung an thiah dan a hmuhnawm.
Second half tan tir lamah Liverpool in penalty hmu in Mohamed Salah chuan an goal thumna a khung a. Penalty hlawhchhuaktu Gakpo-a’n huntawp dawnah Trent Alexander-Arnold ball pek fing atangin a goal hnihna a khung ve leh a ni.
Reds hian group hmahruaitu an nih avangin February thla a play-off round an khelh a ngai dawn lo a ni.
Liverpool manager Jurgen Klopp, “Kan inkhelah lawmna tur a tam. Halftime hma khan inkhel dahtha thei kan ni a, mahse kan thei lo. Goal thumna kan khung khan thil a ti awlsam sawt a ni.” tiin a sawi.
- Brighton an tling
Brighton & Hove Albion in Europe huap inelna an khelh vawikhatnaah knockout stage an lut a, AEK Athens lakah hnehna changin knockout stage a an hmun an tichiang.
Seagulls hian an muala an ngam loh tawh Greek club hi OPAP Arena ah an hmachhawn a. Second half-ah penalty hmu in Joao Pedro chuan an chakna goal ni turin a khung a, 1-0 in an chak.
AEK hian goal an chhuah hnu hian an forward Mijat Gacinovic chu yellow card a hmuh nawn avangin an chan a, tlem zawk an nih hnuah an tan thawh leh a harsa lehzual.
An manager Roberto de Zerbi chuan, “Vawiin hi Brighton, a club pumpui leh fans te tan ni duhawm tak a ni.”
“Kan club tan result hriat reng tawh tur a ni a, zan duhawm a ni. Kan rilru puthmang dik tak kan lantir a, chak duhna leh tlo na kan nei a, football tha khelh kan duhna kan lantir bawk.” tiin a sawi.
- Hammers pawh
West Ham United in Europa League knockout stage khel turin hnehna an chang a. Huntawp dawn lamah chakna goal khungin 1-0 in Serbian club Backa Topola an hneh.
Gradski stadion Backa Topola a inkhelah hian David Moyes-a pawlten nidanga an inkhelh thin dan an pha lo hle a. Amaherawhchu midfielder tangkai Tomas Soucek chuan tunhnaia ram leh club tana match nga chhunga a goal nga na ni turin Maxwel Cornet ball cross chu goal-ah a lo khung a ni.