NGO Coordination Committee huaihawtin nimin khan Mizoram hmun hrang hrangah ‘Kristiante Ni serh humhalhna punkhawm’ neih a ni.
Aizawlah chuan ‘Kristiante Ni serh humhalhna punkhawm’ hi Raj Bhavan hmar lam gate bulah neih a ni a. Thu sawitu, NGO Coordination Committee Chairman Lalhmachhuana, Central YMA president chuan, Election Commission of India (ECI)-in vote chhiar ni atana Mizo Kristiante ni serh pawimawh tak a ruat chu sawn turin kil hrang hrang atangin ngenna lehkha thawn thlak a nih thu leh chhanna erawh vawiin thlengin dawn a la ni lo tih a sawi a, ECI hotute hmaichhan ngeia hmu tura Delhi an kal dawnin ECI mi leh sa, an aiawha Mizorama awm, Chief Electoral Officer chuan appointment an hmuh theihna tura a pui tha tawk lo chu a lungawithlak loh tih sawiin Mizote ngaih pawimawh an hlawh lo hle tih a sawi.
Lalhmachhuana chuan Mizo Kristianten an duh lo chunga sakhaw ni pawimawha vote chhiar luih a nih dawn chuan political party chu hemi niah hian an office-te khar ngam turin a ngen a, vote chhiarna hmuna kal turte pawh kal lo ngam tura a chah bakah candidate thlan tlinte pawhin certificate dawng lo ngam se a duh thu a sawi a, “Chutianga kan dodal theih phawt chuan kan nihna min hrechiang khawp ang,” a ti a, Mizo hnamin nasa zawka nekna pawh a la tawk zel theih tih te, chungah chuan tanrual tlat a pawimawh tih a sawi bawk a ni.
Nimina Kristiante Ni serh punkhawm puala inkhawm hi MUP President Nghaklianmawia’n a kaihruai a, NGO-CC Secretary Prof Malsawmlian’n an hmalakan report a pe a, MHIP, MZP, MSU leh MKHC aiawhten thu an sawi.
Punkhawmnaa telte chuan resolution pahnih siamin, ‘ECI-in Mizoram Assembly inthlanpui, 2023 vote chhiar ni atan Kristiante ni serh leh Pathian kan biakna ni, Pathianni (December 3,2023) a ruat hi tha lo kan ti a, pawi kan ti tak zet,’ tih leh ‘ECI hian vote chhiar ni atan Pathianni a ruat tawh hi sawn ngei turin vawiina kalkhawmte hian kan ngen nawn leh a ni,’ tihte a ni.