Golden State Warriors in regular season bul an tan danah harsatna hrang hrang an tawk chungin hmalam an pan a. 120-114 in Los Angeles Clippers lakah an chak.
Warriors hian tun season-ah beisei loh result an nei leh thin a, match tam a zawna han chak tluan an la nei hleithei lo. Inhliam leh thildang avanga player chhawr theih loh nei leh thin bawkin Zirtawpni zing inkhelah pawh Andrew Wiggins an chhawr thei lo.
Nimahsela an player pawimawh zing ami Klay Thompson-a’n an vanglaia a lo tih fo thin tawh angin hun pawimawhah point a score hnem an chhawr hle a. Fourth quarter-ah a zawna point 10 score in Clippers beihletna an dawl zawh phah a ni.
Thompson hian inkhel pumah point 22 a score a, Stephen Curry chuan point 26, assist vawi 8 leh rebound vawi sarih a nei ve bawk.
Warriors coach Steve Kerr chuan, “Khatiang ang Klay kha kuminah hmuh fo ka inbeisei. Tunhnaiah harsatna hrang hrang tawk mahse a thawkrim a, theihtawp a chhuah reng avangin tun tum kan inkhelah a thawhrim rah a seng ta chiah niin ka ngai.” tiin a team chakpuitu player a fak.