UEFA Europa Conference League-ah Aston Villa in Group E a hmahruaitu ni turin hnehna an chang a, Legia Warsaw lakah 2-1 in an chak.
Ningani zana Villa Park a inkhelah hian Villa tan Spanish defender Alex Moreno chuan inhliam avanga thla ruk chhung a chawlh hnua a kir lehna inkhelah goal a khung a. Second half-ah Douglas Luiz-a freekick pet atangin an chakna goal a khung.
Unai Emery pawlte hian first half-ah Moussa Diaby hmangin goal an khung hmasa zawk a. Mahse an tlarhnungah Boubacar Kamara ball pass sual atangin Ernest Muci chuan Legia si phurh a sut.
Villa hian inkhel hmasa zawka AZ Alkmaar in Zrinjski Mostar an hneh avangin tling chiang tawh an ni tih inhria in inkhel an hmachhawn a. Nimahsela group hmahruaitu an nihna tichiang thei tur goal thumna erawh an khung thei lo.
Group inkhel hnuhnung berah Zrinjski laka point an hmuh belh chuan group hmahruaitu an ni chiang tawh ang.
Inkhel dangah Group F lamah Fiorentina in 2-1 in Racing Genk an hneh a, anni pawhin knockout stage an lut chiang.
Artemio Franchi Stadium ah La Viola in Lucas Martínez Quarta goal khung leh Nicolás González penalty khung hmangin hnehna an chang.
Group G lamah PAOK Salonika chu hmahruaitu an ni chiang a. 2-1 in Eintracht Frankfurt mualah hnehna an chang a. German club pawh hi knockout stage atan an tling tawh.