Kolasib club Project Veng FC in hnehna pawimawh an chang a. Goal li khungin Zote Toyota Mizoram Premier League round 11 ah 4-2 in Electric Veng FC an hneh.
Rajiv Gandhi Stadium a Inrinni chawhnu a inkhelah hian table mawng lama intlansiakna inkhelah penalty vawi hnih inkhel tan tir lamah a awm nghal.
Electric Veng lamin Lalhriatpuia hmanga minute 6-naah khungin Project Veng in Jehova Lalthansanga hmangin minute hnih hnuah penalty atang thovin an sut.
Lalnuntluanga hmanga goal khung belhin second half tan tirah Electric Veng in Lalhriatpuia goal khung hmang bawkin an sut a. mahse Project Veng FC tan MS Dawngzuala leh Andy Lalrinpuia ten goal an khung belh.
Inkhel hmasa zawkah Mizoram Police in Aizawl FC hneh theihna huntha nei mahse Aizawl FC rawlthar H. Lalruatfela chuan goal hnih a khung a, 2-2 in an inhnehtawk.
Lalruatfela hian second 37-naah goal khungin tun season MPL a goal rang ber a ni a. MPL inkhel a vawikhat hmachhawnnaah goal hnih khungin man of the match a thlan a ni.
Police tan hian R. Malsawmtluanga chuan goal hnih a khung ve bawk.