Indonesia-a tlangkang inphuh chhuak thara thi chu chhanchhuah hna thawktuten ruang pakua an hmuh leh hnuah mi 22 an tling ta.
Mount Marapi kang inphuh chhuak avanga chin hriat lohva awm mi 10-te hi zawn dawn pawha a him rih loh avangin Thawhlehni khan zawn chhunzawm chauh an ni.
Thuneitute chuan ruang pakuate hi chawhnu lamah hmuh an nih thu an sawi a, pakhat hi an la zawng zui mek zel a.Hliam tuar mi dang 12 pawh damdawi inah enkawl zui mek an la ni.
Tlangkang hi a la inphuh chhuah thut thut reng avangin ni eng emaw zat chhanchhuah hna a tikhaihlak a ni.
Marapi viltu hotu, Ahmad Rifandi chuan Thawhlehniah ringawt pawh khan vawi nga lai a inphuh chhuak niin AFP news agency hnenah a sawi.
“Marapi hi a la kang nasa hle a, chhumin a khuh vek avangin eng anga sang leh tamin nge a inphuh chhuah kan la hre thei lo,” a ti.
Chhanchhuah hna thawktute chuan tlema a daih deuh hnuah mi zawn hna hi an thawk tih BBC News Indonesia hnenah an sawi a, mi pakhat la hmuh loh hi Nilainiah an zawn chhunzawm dawn tih an sawi bawk.
Pathianniah khan tlangkang hi van lam km thum zeta sangin a inphuh chhuak a, a bul hnai khaw eng emaw zat a khuin a bawh.
A inphuh chhuah lai hian kea zin khawthawng (hiker) 75 zet a chhehvelah hian an awm a, a tam zawk chu hmun hima suan chhuah a ni a, thenkhat chu an kang nasa.
Mount Marapi hi a awmzia chu ‘Mountain of Fire’ tih a ni a, Indonesia-a tlangkang reng 127 zinga pakhat niin hiker-in an tlawh nasa thin hle a. January leh February-ah khan a inphuh chhuah avangin khar reng a ni a, June khan hiker tan hawn leh chauh a ni a. Marapi inphuh chhuah nasat ber tum chu kum 1979 kha niin mi 60 lai an thi.
Pathiannia a inphuh chhuak lai video darhah chuan van sangah tlangkang khu chhah tak invawrh chhuakin a vap chuan khawlaia kawngpui leh lirthei a bawh khat vek bawk.
Thawhtanniah khan chhanchhuah hna thawktute chuan tlang chhengchhe tak karah ruang lain hliam tuarte pawh tlang bulthuta ambulance-in a nghahna lamah an zawn chhuak.
“A sa hle a, thenkhat chu an kang nasa hle a, damdawi inah hruai an ni,” tiin West Sumatra Disaster Mitigation Agency hotu, Rudy Rinaldi chuan a sawi.
Marapi hi Indonesia-a thliarkar 18,000 vel zinga a khawthlang tawp ber leh a lian ber pathumna, Sumatra-a awm niin metre 2,891-a sang a ni.
Indonesia-a thliarkar awm khawmte hi continental plate an tih intawhna lai hiin Pacific Ring of Fire an ti a, tlangkang leh lirnghing awm duhna lai a ni.