Zote Toyota Mizoram Premier League Season 10 round 13-na tun kartawp khan khelh zawh a ni a. Semi-final inchuhna leh tla lo tura inumna boruak a ngaihnawm tulh tulh.
Zirtawpni zanah Rajiv Gandhi Stadium-ah Chanmari FC in 3-0 in FC Venghnuai an hneh a. Lalkhawpuimawia, Laltlanzova leh Vincent Lalduhawma ten goal an khung a. Chanmari in semi-final an lut chiang a, Venghnuai erawh tla thei dinhmunah an ding,
Inkhel hmasa zawkah Mizoram Police leh Chhinga Veng FC te goal inpe lovin an inhnehtawk a. Police tling tawh mahse Chhinga Veng in Aizawl FC lakah an semi-final hmun ni thei tur an hum a la ngai dawn.
Inrinni tlai inkhel hmasa zawkah I-League club Aizawl FC in Electric Veng FC an hmachhawn a, 2-1 a an tlawm avangin semi-final lut turin Nilaini ah Venghnuai an hneh a, Ningani a Chhinga Veng an tlawm an mamawh bawk.
Electric Veng tan KC Malsawmsanga leh Laltluangpuia ten goal an khung a, tla thei la ni mahse an dinhmun an siamtha.
Inkhel hnuhnung berah champion lai Chawnpui FC in Project Veng FC 3-1 in an hneh a. Semi-final an lut chiang tawh.
Chawnpui tan Vanlalthanga’n goal a khung bakah David Laltlansanga chuan goal hnih a khung a. A sang pali zinga tel tur chiang an ni tawh.