- Zirsangkima
Krismas rim a nam tan chék chék a, Tlángsàm pár leh khàm panga Bawngpupárten lal lai chen tumin tan an khawh ve mék bawk. He tih hun lai, zíng ni chhuak leh tlai ni tla tùrten tih tak zeta lung an tih àwi veng veng hun lai hian kum ruk liam taa ka Krismas present dawn kha ka hre chhuak leh thìn.
Ka nunna hnár pakhat, ka pangkhing ang hiala ka ngaih thin, ka hmangaih ber kha nula khân ka lung a ti awi hliah hliah thìn a nih kha. A kianga ka awm tawh chuan, thlasik thlifím te pawh hi an thiang bîk riau thìn a; zàn thla ëng leh tlai ni tla tùrte pawh hian lung an run zual bîk ni te’n ka hre hial thìn. Amah chu ka ni tin nun a ni a, ka diary pawh a ni. Amah hmu lo, si lo leh tawk loa ni lèn kha hremhmun tènau a ni hawt a; amah chu ka kham theih loh chaw a ni thìn—ni e, vawiin thleng paw’n a la ni ta reng!
Min kalsan ní kha ka la hre reng mai—a tahrik ní thleng paw’n—December ni 16, Inrinni tûk a nih kha. Khami tûka ka mut tuizia pawh kha ka la inhria. Zíng ni chhuah hmain ka phone-in min kai harh a, a ri chàwl lo. Min rawn biak tumtu chu ka’n en a—amah a ni! ‘A va’n hun lo tak!’ ti rilru chungin ka hmet tàwp a. A rawn ri leh zêl si. Peih lo zetin ka la a, ‘Eng nge Ame! Ka la mu!’ tih pahin ka hmet tàwp leh.
Ani nèn hi chuan hming thain kan inko ngai lo. “Amelia” ti loin, “Ame” tiin ka ko a; ani paw’n “Daniel” min ti bîk lo—“Da-a” min ti ve bawk.
Ka chhíng tan leh diar diar a; Amelia chu a rawn ri leh. Ka la a. ‘Da-a, tho rawh! In gate bulah ka ding reng a nia,’ a rawn ti ta heu mai! Tho lo takin ka tho a. Ka inphih thuak a. Gate chu ka va hawng a.
‘… ‘Nge, i la insiam loh?’
‘I mäwl ‘mi? I ti tak tak em ni?’ ka ti lêt háw a.
‘Ka sawi vek tawh kha. Va inhà la, kal ang,’ mi ti leh ringawt!
‘Khawiah chuan?’
‘Nimin tlaiah ka sawi vek tawh kha maw le!’ a ti leh a …
A hma ní chu Amelia te pisa kai tàwp ní a ni. Ka thianpa Maruata dàwr, The Book Café-ah ka lo nghâk a. A lo thlen hmain ka thianpa nèn a chanchin kan lo sawi chiam mai. Ka thianpa chuan Amelia chu, “Duh leh huam huam” min tihzia te sawiin chin tâwk nei tùrin min ti a. ‘Keini paw’n, mi dang paw’n ngaihzáwng kan nei ve tho … heti êm êmin tù ma’n hmeichhia kan ngaizáwng ngai lo—a ten têp tawh ang che!’ ti te’n min zilh hial. ‘A then hunah che chuan aw … i tuar leh lutuk ang a, i khaw loh phah vek ang tih a nia ka hlauh ni!’ te pawh min ti!
Ka thianpa min zilhna chu ka haw hauh lo; ka nihna dik tak a sawi miau a. Mahse, a thu sawi ka pawm theih loh leh chhàn lêt ka châk êm êm chu, ‘A then hunah che chuan …’ a tih tak mai hi a ni. Amelia nèn hian inthen thei kan ni lo! Kan thei lo ve ve ang! Ka chhàn hma-in Amelia a lo lût hman.
Maruata chu a tho hluai a, Amelia chu thutna a kian a. Hmel-tha-lalnu chuan tawngkam mawihnaiin la thu ve rih tùrin a ti ve … a hnuah inthlahrung àwm deuhin a thu ve ta tho a. Ka khawvêl chu a danglam leh ta! A hma lawka ka hmaa thu ka thianpa leh tün maia rawn thu thar chu, kàngthai leh rose pár ang vêla inang lo ni hian ka hre hial!
Kan hmaa dawhkàna Cappuccino khu vat vat rawn dahtu kal kian hnu chuan Amelia chuan ka mitah tak min en kal mai a. A ngawi reng si; ‘Eng nge!?’ ka ti chhuak ringawt!
Thil serious tak sawi duh a nei leh tawh a ni tih hre thiam tùrin amah hi ka hre chiang tâwk tawh. ‘Kumin Krismas chu kan hmang dùn thei dáwn lo ka tih tawh kha aw … naktûka ka present pêk tùr che nèn hian in hman dun a ngai dáwn. Hrilh che ka hreh aia nasain hman dun theih loh hi ka hreh zâwk! Mahse …’ a ti chuai raih a. A bag atang chuan present báwm a rawn la chhuak a.
‘Eng a!? Enga i sawi a!? Amelia!’
‘Naktûkah ka pe ang che … ,’ tiin a bag-ah present báwm chu a khung leh a. ‘Ka sawi nawn leh ang. La na suh aw. Nuam tùr chuan hrehawm hmasak a ngai thìn,’ a ti leh a. A coffee no chhém heuh heuh pah chuan Krismas leh kum thar pisa chawlh chhúng zawng hmun danga min awm bosan tùr thu chu a sawi nawn leh a.
Ka thin a rim hle. A thil tum chu thil tha pawh a ni; mahse, ka pawmpui thei tlat lo. Lungàwi loh lantíra chhuahsan chu ka duh tak zet. Mahse, ka nupui hual Amelia thu sawi tàwpna chuan min hneh tlat nia!—‘He khawvêla ka hmangaih ber nang aia thlan hmasak tùr leh hmangaih hmasak zàwk tùr ka nei tlat a! Chu chu nang paw’n i thlan ve theih nán Krismas kan hman dun loh hi a tül rih si a,’ a tih hian!
Kan awmna, véng chuanhnuai atanga la mawng fé panin Amelia chu ka phur a. Rei fé kan tlàn hnuah gate lian pui awmna chu kan thleng a. Chu lai hmun chu ka vawi khat kalna a ni. Amelia hnênah chuan, ‘Hei hi maw!?’ ka ti ringawt. Ngawi rengin a bu nghat ringawt.
Chu hmun chu cement bang lian pui puiin a hual khup a. A chhúngah chuan in sei pút a ding. Chutah chuan, he khawvêla ‘Ka nu, ka pa’ tih tùr nei ve loho, fahrah an awm khâwm a lo ni a. Chu Home-ah chuan a ni, ka thlâkhlelh ber Amelia chuan, a mi ngaih ber leh a hmangaih ber kalsana Krismas leh kum thar chawlh hun chhúng a hman dáwn ni! Home-a thawktu indaih lohna avàngin a chawlh chhúng chu an mahni tanpui tùrin a inpe tawp a ni.
A nihna takah chuan, min awm bosanna tùr hmuna kalpuia ka thlah hräm duh hi mak ka inti! Tin, hetia inngaihzàwn lai atanga a thu thua min awmtír pawh hi “thai-bawih” sa riaua inngaihna te pawh ka nei ve. A thil tum min hrilh tirh khán ka thinrim tak zet a. Nimin tlaia a sawi nawn leh tum paw’n ka thin a la rim tho—tûkin thleng pawh khán. Mahse, Amelia hian ka duh loh min duhtírin min heti tlat si a nih hi! ‘Min liamsan hlen tùr ni loa min kalsan lawk tùr a nih hi,’ tiin ka inhnèm chawp ta ’ngawt a.
‘Da-a, hei hi inah i hawng chauh dáwn nia—Krismas i hmanpui tùr ka tih tawh kha. A kárah lehkha ka zep thluah a nia,’ tiin Amelia chuan present báwm chu min pe ta a.
‘Ame, Krismas hi kum 10 dáwn kan hmang dùn tawh a; hetia …’ ka hnuk zuk ulh dáwn a! ‘ “Krismas nang nèn” kan ti thìn kha a nia. Mahse, “Krismas nang nèn lo!” ka ti mai a ni ang chu,’ ka ti ta daih a.
‘Kan pahniha hlim taka Krismas kan hman dun thin aia hlimawm zâwka hman dàn a awm—thinlunga Krismas kan hman chhan dik tak kan neih phawt chuan. En teh Da-a, mangtha rih phawt aw. Ka hmangaih che.’
Ka chháng tawh lo! A thu sawi awmzia taka pawh chu ka hre lo! Ani nèn loa hlim taka Krismas hman … maw? Ka thei “nguar” ang! Ka haw titih tlat a. Ka hnung chhawn a. Ka car hùnna lam chu ka pan tau nghat nghat a.
Car-a ka luh hnu, motor ka tih nun lai pawh chuan min la thlír reng tih ka hria. A mufler awrh laiin a mittui a hru fap fap tih pawh ka hmu zuai. Mahse, ka en reng duh bîk lo—“Krismas khawhar thlâk” min hmantír tuma min kalsantu chu!
In ka thleng a. A present báwm chu ka hawng a. A chhúngah chuan Bible zu lo awm a! ‘A ho mang e!’ han ti dáwn ila Bible meuh ho han tih chu ka hreh ve deuh tlat a. A sawi angin a kárah chuan lehkha them a lo zep thluah bawk.
Amelia nèn hian kan inhmangaih tak zet a, kan inmil êm vàng a ni ang … ti ngawt ila kawng khatah erawh kan inmil thei tlat lo! Chu chu kan la inneih theih loh chhan ber pawh a ni—a buaipui êm êm Pathian, kohhran, inkhâwm, thalai fellowship tih vêl, eng teh vaka ka ngaih ve loh avàngin! Pathian thu, Isua chanchin tih vêl hre lo thak chu ka ni bîk lo—sual thu leh pian tharna thute pawh. Mahse, ka buaipui peih thlâwt lo a ni e! Ame-i ve thung chu “inla-Kris” an tih ang êm êm ni si loa Pathian ring bur mi a ni. Chance han neih ve tum pawha tawngtai tum phêt ang chi hi a nia; a ninawm hi ka ti deuh mah mah thìn.
Ka Krismas present dawn chu ka chhiar ta poh a. Sande sikul ka kai ve laia tantua min ruat ve nawlh tuma ka chhiar hnua Bible ka keu lehna hmasa ber a ni hial ta ve ang a! A lehkha zeh chu ka chhiar a—Isua pian thu. Ka hriat hnu vek! A lehkha zeh dang chu Isaia bung 53 a ni daih. Ka chhiar tui ta phian. A tàwpah chuan mak tihna hlïrin ka khat ta a!
Isua Krista hian lal a nih anga vàn angelte chawimawia awm ringawt a thlahlel a lo ni azáwng lo mai! Ka dam nán, chatuana nun ka neihna tùr hi a thupui ber a lo ni zâwk a. Rethei leh riangvai tùrin, hmuhsit leh endawng tuara thing anchhedawng krawsa thi tùrin, ran thlêng a rawn bèl chat a nih chu! Min hmangaih êm avàngin, vàn ropuina leh amah thlahleltu a Pa leh vàn mite paw’n an ui bet zo lo!
Ka kianga awm thlahlela min hmangaih êm êmtu Amelia ai hian Isua hian min lo hmangaih daih zâwk a. A kalsan leh Ame-i nèna kan kalsan ve hi, a khaikhina han khaikhin chi rual a lo ni hauh lo mai!
Hemi kum atang hian “Krismas dik tak” ka hmang tan ve ta a, ka inchhïr ngai lo. Rethei taka a lo pianna ran thlèng leh kraws leh vànna lal lukhum inzawmna hun a ni tih ka hre tawh si a.
Amelia rawn lêt leh tum, kan inhmuh phata kan hlimzia chu, heta sawia ziah zawh rual a ni lo! Mihring inhmangaih tawnna satliahin kan inhmangaih tawh lo a; Pathian hriatpuina leh malsàwmna chang dùn chunga inngaihzàwn nawmzia mai chu e … sawiin a siak lo!
Kan duhnate Pathian kan hriattír zêl a. Hei tünah phei chuan ka bialnu Amelia kha ka nupui ni tawhin, kan fa hmasa ber tùr pawh, thla thar khian neih kan inbeisei ve tawh asin!
Kum tin Krismas a lo thleng a. Tùn hmaa Krismas present dawn loh leh Krismas hman dun loh ang te kha kan hlau tawh lo a; Krismas awm chhan leh present hlu ber kan dawn buaipui loa Krismas hman hi kan hlau ber tawh zâwk a ni.