Manchester City in a zawna match li chak hmel an hmuh loh hnuah hnehna chang turin Luton Town lakah an ‘comeback’ a, 2-1 in hnehna an chang.
Pathianni zana Premier League inkhelah Pep Guardiola pawlte hian December 2019 hnua a vawikhatna atan league inkhelah a zawna tlawm an hnaih viau hman a. Kenilworth Road-ah halftime dawnah goal an chhuah.
Luton Town tan Elijah Adebayo chuan Andros Townsend ball cross atang an goal hmahruai a khung.
Mahse second half-ah Manchester City an insangmar a. Penalty area-ah Bernardo Silva chuan ball changin remchang a neih chu a chhawr nghal a, an si phurh sutna pet kual lut mawi.
Minute thum hnuah City in an khung belh lehnghal. Julian Alvarez-a ball cross atangin Jack Grealish chuan an chakna goal a khung a ni.
Hnehna an chan avangin champion lai hi palinaah an awm mek a, point li in hmahruaitu Liverpool an pha lo. Hetihlai hian Luton hian relegation an la chhuahsan thei lova, point li in dinhmun him lam an hlat mek.
Manchester City boss Pep Guardiola chuan, “Kan inkhel hnuhnung ber result in a nghawng ngaihtuah chuan kan kheltha tak zet. First half tawp dawna goal chhuah kha a na hle a, kha kha kan tan fiahna lian a tling. Mahse kan player-ten tho leh turin goal an chhuah hnuah harsatna an nei lo.”
“Second half-ah kan kheltha lo zawkin ka hria, mahse first half-ah khan kheltha zawk chungin goal kan khung thei lo a ni.” tiin an inkhel a thlirlet.
- Blues an tlawm
Point paihsak an nih hnuah Everton an che tha chhunzawm a, a zawna vawi thum league a an chakna ni turin Chelsea lakah 2-0 in an chak.
Toffees hi kum 2021 hnua a vawikhatna atan league inkhelah a zawna tum thum an chakna a ni a. Goodison Park-ah Abdoulaye Doucoure leh substitute Lewis Dobbin ten goal an khung a, point li in relegation zone an kalsan.
Mahni mualah Everton goalkeeper Jordan Pickford chuan Enzo Fernandez leh Cole Palmer te goal khung tur a save tha hle. Lehlamah Jack Harrison leh Dwight McNeil ten goal an khung teuh ve viau bawk.
Chelsea in goal nawr na in hlauhawm siam thei thin mahse a tawp an khar hleithei ngai lova. Second half tan tira goal an chhuah hnuah si phurh sut tum viau mahse huntawp dawnah an chhuah belh leh zawk.
- Spurs an chak ve leh ta
Tottenham Hotspur in tunhnaia an match hnuhnung panga atanga vawi li an tlawm hnuah hnehna an chang ve leh a. Inhliam avanga squad buai tak Newcastle United hmachhawnin 4-1 in an hneh.
Tottenham Hotspur Stadium-ah left-wing back Destiny Udogie chuan Spurs tan goal a khung hmasa ber a. Hemi hnuah hian striker Richarlison chuan goal hnih khungin Son Heung-min-a’n penalty atangin an goal thumna a khung a. Magpies tan Joelinton chuan goal khat a khung ve bawk.
Spurs hian October 27 a Crystal Palace laka an chak hnua hnehna an chan leh hmasak ber a ni a. Manager Ange Postecoglou chuan, “Ka naute sawiselna tur ka nei lo. Vawiinah hnehna chang turin an thawkrim a, an theihna zawng zawng nen an bei. Goal hmaah tum dang aiin kan hriam zawk a. Son-a khelhthat zar kan zo a ni.” tiin inkhel zawhah a team a fak.