Mizoram chief minister Lalduhawma chuan mizoramah Central bureau of Investigation (CBI) chu general consent peka mizoramah koh luh an nih tur thu a puang a. Hei hian titi a siam tam hle mai. CBI hian an hnathawh danah state phalna lo chuan an duh duhin state chhungah hma an la pawp pawp thei lova. State phalna an lak a ngai a ni.
Central sawrkar hmarua an ni a. Eirukna leh case harsa deuh bikah chuan rawih an ni tlangpui tawh. CBI leh state inkara hnathawh dan hi chi hnih a awm a. Pakhatah chuan state in general consent (state a rawn inchhawp luta tul tih zawng chhui tura) pe a koh luh a ni a. Tih dan tlangpuiah chuan state ah office neiin SP in emaw a ho ang a. Hna an thawk ang. Pakhat lehah chuan kan rama thubuai pawimawh kan tihte chauh hi chhui turin CBI ah case kan pe thei. Hei hi CBI lamin hman an intih chuan hma an rawn la ang.
Hun rei tak ata tawh CBI koh luha corruption case chhui tir hi kan sawi ri thin a. Eirukna chhui tur pawhin kan duh a ni. Amaherawhchu CBI koh luh chungchangah hian fimkhur a ngai hle. Tuna central sawrkar chelhtute hian CBI hi politics hmanruaah an hmang niin state tam takin an hre ta tlat a. Chuvangin state pakua lai heng Meghalaya, Jharkhan, Telengana, West Bengal, Punjab, Chhatisgarh, Kerela, Rajasthan te in hnukdawkin Mizoram hian 2015 khan an lo in hnuk let tawh a. Tuna centrala sawrkar Bjp kalphung hi kan hre vek a. An sakhua leh an party an thlun zawm a. Chumi ti chak tur chuan eng hmanrua mah an hmang hreh lova. Mite rin hlawh tak CBI pawh hi politics a hmelmate beih nan an hmang niin an hre ta tlat a. Sum leh pai chheprelh nia an hriat an dap thut thut a. A bik takin WB ah phei chuan Trinamool party hote kawmngeih deuh mihausa te an dap nasa hle. Hetiang hi CBI hmanrua a an hman dan a ni a. An hnathawh tawh thin dan ngawr ngawr piah lama central in a hman dan hi kan tan pawh hian a him chiah em tih ngaihtuah a ngai hle.
Central lam nen hian Culture hrang nei, sakhaw vawn duh dan in ang lo tak kan ni a. Dik tak chuan anni hi chuan hindu sakhaw luipuia min luan luh tir vek an duh a. Keini lam hian kan duh teuh silo. Zawi zawia hmanraw hrang hranga min nek lai hian kan chungchanga an rawn inrawlh tam loh hi kan tan a tha ber tih chu kan hria. Kan engkim mai lipse tura vai police thuneihna sak tak nei koh luh ai hi chuan kan state police te hi thuam chak ila. An harsatna awm thei dan lam pawh ennawn zawk ila. Min chhui tur hian an tha tawk a ni. CBI rawih duh bik riauna kan nei anih pawhin a case azira kan koh luh hi tuna kan kal dan tur ni zawk rih awm tak a ni.