UEFA Champions League Group D atang tling chiang tawh pahnih Real Sociedad leh Inter Milan ten pakhatna nih inchuhin group match hnuhnung ber an khel a, goal inpe lovin an inhnehtawk.
San Siro-ah hian La Liga club La Real hian tun group stage-ah la tlawm miah lo chungin khelmual an lut a. An khingpuite ang bawkin vawi thum chak a, a bak zawng draw result neiin group an khar.
La Real hian first half-ah ball chang hnem zawk mahse hlauhawm taka goal nawr an nei tam lova, Inter goal ah shot vawikhat chiah an nei. Nerazzurri hian mahni mualah fimkhur takin an mikhualte an lo hmuak a. Counter-attack a innghatin goal hlauhawm an ngah bik lo.
Second half-ah erawh team hlauhawm zawk an ni a, an top scorer Lautaro Martinez chuan substitute bench atanga dah luh a nih hnuah huntha a hloh nual.
Real midfielder Martin Zubimendi chuan, “Kan tan zan duhawm a ni. Bul kan tan laia kan tum leh ngaih pawimawh ber chu pakhatna nih hi a ni a. Kawng awlsam ni lo mahse kan hlenchhuak thei a ni.” tiin a sawi.
Inter manager Simeone Inzaghi chuan, “Pahnihna nih hian kan tan round of 16 ah thil a ti harsa zual hlek thei tih kan hria a, mahse kan chak zawh loh avanga lungngaih ka duh lo. Kan group atang tlawm miah lovin kan tling hi thil lawmawm a ni a. A zawna kum thum nan knockout stage kan khel dawn a, a lungawithlak hle.” a ti ve bawk.
Inkhel dangah Benfica in Salzburg a Red Bull Arena-ah Austrian club FC Salzburg chu 3-1 in an hneh a. Benfica tan Angel di Maria chuan minute 32-naah goal a khung a, Rafa Silva goal siamsak leh bawkin Arthur Cabral chuan an goal thumna a khung a. Hnehna an chan avangin Europa League an khel chhunzawm ang.