Tripura-ah nimin khan NLFT (Sabir Debbarma kaihhruai) hel pawl mi 88 zet chu Ambassa, Dhakai district-ah sorkar kutah an ralthuamte nen an inpe a. Helho hi Chief Minister Biplab Kumar Deb leh a deputy Jishnu Debbarma awm laiin an inpe a ni.
Pathianni khan NLFT (SD), Tripura sorkar leh sorkar laipui chuan inremna, Memorandum of Understanding (MoU) an ziak a. He memorandum ang hian NLFT (SD) chuan an helna kalsanin India danpui hnuaiah nun pangngaia nung turin an inpe a ni.
Chief minister chuan an inpekna chu lawm taka lo pawmin an inpek theihna tura tiamte chu kim taka pek vek an ni dawn tih a sawi a. Tripura sorkar chuan an state chhunga tribal-te tan a tha thei ang berin thil a ti zel dawn tih a sawi bawk.
Hel inpete hian Ministry of Home Affairs-in Surrender-cum-Rehabilitation Scheme, 2018 a neih sa angin hamthatna an dawng dawn a. State sorkar chuan chenna in bakah hna a pe ang a, zirna leh thil dang dangah a chhawmdawl ang bawk a. India sorkar pawhin an hamthatna tur hrang hrang a ngaihtuahsak bawk ang.