Milwaukee Bucks star player Giannis Antetokounmpo chuan an team chanchina inkhel vawikhat a point score hnem ber ni turin point 64 a score a. Indiana Pacers lakah 140-126 in a chakpui.
Kum 29 mi Antetokounmpo hian kum 2006 a Michael Redd-a’n point 57 a score chu a khum a. Rebound vawi 14 hnehna an channa kawngah a la bawk.
Bucks hi kuminah NBA Finals khel ngei tura rinhlawh team zingah an tel a. Vawi 24 inkhel tawhin vawi 17 an chak tawh a, Eastern Conference-ah pahnihna an ni mek.
Pacers leh Bucks te hi tun thla chhunga an intawn tum hnihna niin December thla tir khan In-Season Tournament semi-final ah an inkhel tawh a, hemi tum hian Pacers hian 128-119 in hnehna an chang.
Inkhel zawhah team pahnih inkarah buaina tenau a chhuak a. Antetokounmpo chuan record a siamna game ball chu lak a tumna lamah team pahnih player-te inkarah buaina a chhuak a, mahse khap daih theih erawh an ni.
Bucks coach Adrian Griffin chuan, “Dan theih a ni lo. One-on-one a ven theih tak tak a ni lova, chuta karah a kianga khel turin player tha tak tak kan nei nual. A tawpah erawh danglamna siamtu a ni fova, ani hi kan chakna bulpui ber chu a ni.” tiin a player a fak.
Inkhel dangah In-Season Tournament champion Los Angeles Lakers in 122-119 in San Antonio Spurs an hneh a. LeBron James a inkhelh loh zanah Anthony Davis bawk a langsar.
Davis hian point 37 leh rebound 17 a nei a. Lakers hi match 25 atang vawi 15 an chak tawh.
Spurs tan Victor Wembanyama chuan point 30, rebound 13 leh block vawi ruk a nei thung.