Everton in FA Cup fourth round-ah Premier League club dang Luton Town an hmachhawn dawn a. Replay inkhelah Andre Gomes-a freekick goal mawi hmangin hnehna an chang.
Nilaini zanah Goodison Park-ah third round replay hi khelh a ni a. Gomes hian minute 42-naah metre 23 a hla atangin an chakna goal ni zui tur hi a pet lut a, 1-0 in hnehna an chang.
He hnehna hi Everton in December 16 hnua inelna hrang hranga an chan leh hmasak ber a ni a. An muala inkhel nimahsela goal hlauhawm a tam lo. Team pahnihte an fimkhur a, goal hlauhawm mumal aiin muallai a indanchah a tam zawk.
- Toffees beiseina
Everton tana goal khungtu Gomes hian kum 2022 May hnuah a tum hnihna atan Everton inkhelah bul a tan lehna chauh a ni a. Nimahsela Toffees tana kheltha tak niin match nga chhunga a goal hnihna a khung bakah an inkhelah a ke atanga ball tha chhuak a tam.
First half-ah Everton tan striker Dominic Calvert-Lewin chuan goal hlauhawm neiin Crystal Palace keeper Sam Johnstone-a’n a save sak a tha tak zet.
Karleh Inrinni zanah hian Luton Town nen an inhmachhawn leh ang.
EFL Championship club Norwich City chuan goal an chhuah hnuah goal thum a khung a. Premeir League hmahruaitu Liverpool nen karleh Pathianni zanah an intum ang.
Memorial Stadium a inkhelah Bristol Rovers in minute 20-naah Luke McCormick hmangin goal khung hmasa mahse second half tan tir lamah Gabriel Sara leh Adam Idah ten Norwich City tan goal an khung a. Kenny McLean chuan an goal thumna a khung leh bawk a ni.
Premier League club Nottingham Forest pawhin fourth round an lut a. Bloomfield Road-ah League One club Blackpool hmachhawnin 3-2 in extra-time ah hnehna an chang.