Aizawl : Khawzawl Bawrhsapin K. Lalrohlua’n nimin khan Tualpui VC te kaltlangin Tualpuia RMSA High School tan Computer leh Printer bakah zirlai ten study camp an neih chhunga an thingpui inna tur a pe.
December ni 19, 2023-a Khawzawl Bawrhsapin Tualpui khua a tlawh khan Tualpui RMSA High School-in Computer leh Printer Set an mamawh thu an lo thlen a. Hemi tum hian Bawrhsap hian VC te leh YMA, MHIP leh MUP te nen an inkawmna ah zirna ah hma an sawn theihna tura tan la turin a sawm a. Khawtlang hruaitute nen khaw chhunga zirna in – Govt. Primary School, Govt. Middle School, RMSA High School te bakah Health & Wellness Center te a tlawh bawk.
Bawrhsap hnenah hian Govt. Primary School leh RMSA High School ten Computer leh printer an mamawh thu an lo thlen a, Govt. Primary School hnenah hlan nghalin, nimin khan RMSA High School ta tur chu Tualpui VC te kutah a hlan ve leh ta a ni.
Nikuma HSLC exam-ah khan Tualpui RMSA High School atanga zirlai exam te chu an pass vek a, kuminah pawh za-a za pass leh turin tan an la nasa hle bawk.