Government Mizo High School Mipa Pipe Band te chu Republic Day 2024 denchena rampum huap sikul band te inelna – National School Band Competition ah an tel dawn a. He inelna hi New Delhi-a National Stadium-ah tun thla ni 21 leh 22-ah neih a ni ang.
National School Band Competition hi sawrkar laipuia Ministry of Education leh Ministry of Defence tangkawpin kum 2017 atanga an buatsaih thin niin, category pali-ah inelna neih thin a nik a. National Level Competition a tel tur hian Zone pali – Eastern, Western, Northern leh Southern Zone ah te inelna neih hmasak niin Eastern Zone a intihsiakna, December 2023 a neihah Government Mizo High School Pipe Band (Mipa) te hi a titha ber niin, Eastern Zone aiawha National Level a tel tura thlan an ni.
National School Band Competition-ah hian Zone hrang hrang atangin category tinah school pakhat zel an tel dawn a, a vaiin school 16 he inelna hian an tel dawn a. Zonal competition hrang hrang neiha school band 73 tel atangin Zone tina ti tha ber te National Level a tel tura thlan a ni.
Government Mizo High School Pipe Band hi kum 2000 a din niin, Mizorama Independence leh Republic Day lawmna ah te tum engemawzat lo tel tawhin mipui lawm an hlawh hle a. Hemi bakah 2007 khan NCC RDC Delhi ah pawh an lo in lan tawhin Prime Minister’s Rally ah pawh an thiamna an lo pholang tawh bawk.