- Dr. C. Lalrampana
A KAMKÊUNA
“Sihalte’n kua an nei, savate’n bû an nei; mihring fapa erawh chuan lu nghahna a nei lo.” tia Isua’n a zirtirte a hrilh ang khan mihausa leh neinung tak takte’n chênna in nalh tak tak, nuam tak tak, ropui tak tak, chhâwng sang pui pui, hmun tin deuh thawah a kawpa thuaha an neih khep khup laiin mirethei chhumchhia leh BPL chhungkaw tam tak chênna in leh lunghahna nei ve lo an tam hle. National Institution for Transforming India (NITI) Aayog’s Multidimensional Poverty Index Report 2019-in a tarlan danin India ramah mirethei chhumchhia (slum population) maktaduai 65 an awm a; state mal khai zingah Gujarat-in mtd 1.6 mirethei chhumchhia neiin India state zingah rethei chhumchhia ngah ber a ni. Aizawl district mipui 390,000 zingah mirethei BPL 15,736 an awm mek a, heng bakah hian thingtlang atanga Aizawla pêm in leh lo nei lo tam tak an awm bawk.
LUNGHAHNA NEI LO
The Hindustan times-in Delhi sorkar socio-economic survey a neih report a tarlan danin Delhi-ah mipui vbc 2 an awm a, heta tang hian 66.63% -te hi in leh lo nghet nei an nih laiin 32.38% erawh in leh lo nei lo, mi in luah hawh an ni. Aizawlah in 60,635 awmin BPL 15736 an awm. Aizawlah hian mihring 405000 awmin chhungkua 221077 an awm a, zaa 65.8% -te chu mahni in leh lova khawsa an nih laiin zaa 31.8% mi in man chawia luah an ni. Heng zinga zaa 2.8% chu Assam type (kutcha house)-a awm an ni. Heng bakah hian Mizoram Government Official tarlan danin Bangladesh atanga raltlan 900, Manipur atangin 8000 leh Myanmar atangin 40 000 vel raltlan awmte nen phei chuan in leh lo nei lo an tam hle.
IN LUAH MAN
Kan unau raltlante bakah in leh lo nei lo, BPL chhungkua engemaw zat leh thingtlang atanga Aizawl khawpuia lo pêm leh zirlai tam takte’n Aizawl khawpui an rawn bêl a. Hman deuh lawk khan Aizawla in luah man hi Rs4,000-8,000 a ni tlangpui thin a; kum 2021-atanga kan unau Myanmar, Bangladesh, Manipur atanga raltlan lo awm achin Aizawl veng tinah in neitute’n in luah man an tisang ta chiam chiam niin a hriat theih. Tunah phei chuan thla khatah Rs 6,000-15,000/20,000 a ni deuh tlangpui tawh a ni. Hetihlai hian veng thenkhat phei chu in luah man to uchuak bikna a la awm cheu bawk nia sawi a awm. Sumdawnna hmunpui (commercial area)-a dawr luah mante chu lo sang deuh pawh ni se a hmun azirin thil âwm tak a ni. Mahse, chenna tur in luah man heti taka sang hi a uchuak mah mah em? tih ngaihtuah tham tak a ni. Sorkar hnathawk leh sumdawng neinung deuh lo tan phei chuan in luah tur zawn hmuh a har hle bawk a, mirethei, chhangchhia leh chhungkaw member tam deuh phei chu an hnawng duh hle. Heti taka in luah man sang ta mai hi mirethei harsa zualte tan chuan dam khawchhuah a har sawt hle. Aizawl khawpui entawnin district khawpuiahte leh khawpui lian deuh thlengin Mizoram pumah in luah man hi a pung chak hle nghe nghe a ni.
RENT CONTROL ACT, 1948:
AMC hian Rent Control Act, 1948 hi a takin kalpui ve se. AMC leh LMC huam chhungah LC-in kengkawhin, thingtlang lamah erawh VC-ten kengkawh se a tha ngawt ang. He dan hi in neitu (landlord) leh in luahtu (tenant)-te dikna chanvo humhimna kawngah a pawimawh hle a ni. Rent Control Act, 1948 hi state hrang hrang tan a ni a, danglamna tenau engemaw zat erawh a awm thei. In neitu leh in luahtu chuan ziaka inremna (deed agreement) an ziah a ngai. Hei hian an pahnih hlãwkna leh dikna a humhim thei a ni. Tawngkaa inbiakremna (Oral agreement) chauh hi chu thubuai hlabuai a awmin dan anga hmalak a harsa thin. Hei bak pawh hi in luah lai enkawl, cheibawl, inhnawhchhuah, chhiat that, tui, êng leh mamawh dang chungchangah thlengin in luah dan (Rent Control Act) hi a kalpui ngei ngei a ngai a ni. Tin, mimalin in luah man duh ang anga a tihdanglam zung zung thin loh nan AMC hian Rent Authority siam bawk se, in luah man rual khai taka hman tlan a nih theih nan a tangkai hle ang. Rent Authority-in a khawih theih bak erawh Rent Court or Rent Magistrate-ah thlen thin ni se khawpui chhung inrêlbawl dan tha tak a ni ngei ang.
A TLÃNGKAWMNA
Mizote hi kan inpawh tlangin kan innél tawna a thatna tam tak awm mah se, kan zahawmtawnna bo thak khawpa intlawh pawh leh innêl dan chin tawk kan thiam erawh a ngai hle. Inneitu (landlord) leh inluahtu (tenant) inkara deed agreement siam thin pawh hi state danga an kalpui lai reng a ni a, keini erawhin kan ti ve duh lem lo tlat pek a. In luah hmaa security deposit pawh luah man advance tiin dan hrul hretah a hmingin kan kalpui ve lawi a. Hei vang tak hian in luah dan (Rent Control Act, 1948) hi kan ram leh hnam khawtlang nun dan leh sukthlek mila siam tha (amend)-a thu awi taka kan hman theuh hi a pawimawh hle. Aizawl veng hrang hranga in luah man rualkhai lo lutuk leh mi duhãm zual sawì kai hat, chutiang zelin inluahtu luhlul leh inla ngeng bik tak, inluah man pe tha duh lo awm theite thlengin dan tha tak kan neiha kan hman chuan Democracy principle dik tak kan vawng nung reng thei dawn a ni. Chuvangin, state sorkar leh Municipal Corporation-te hian ngun taka ngaihtuahin ruahmanna siam ngei se a lawmawm ngawt ang.