Aizawl : Sawrkar laipuiin ram mipui tana hma a lakna hrang hrang inhrilhhriatna leh a chhawr tur mipuite kawng kawhhmuha, a theih ang anga a hmuna scheme a inziahluh leh kalpui theih te kalpuina beihpuithlak Viksit Bharat Sankalp Yatra chu Lawngtlai District chhunga khua/veng 59 ah hlawk taka kalpui a ni tawh.
VBSY hi Lawngtlai District-ah kum kalta December 19 atang khan kalpui tan niin, Inrinni kalta thleng khan Lawngtlai RD Block a khua/veng 22, Bungtlang South RD Block a khua/veng 21 bakah Chawngte RD Block a khua / veng 16 ah kalpui a ni tawh a, hriat theih chinah Yatra chhimtu mipui 7,259 an tling tawh.
Lawngtlai District a Viksit Bharat Sankalp Yatra’ kalpuina ah hian Ayushman Bharat – PMJAY, PM Garib Kalyan Anna Yojana, Deendayal Antyodaya Yojona – NRLM, PM Awas Yojana, PM Ujjwala Yojana, PM Vishwakarma, PM Kisan Saman, Kisan Credit Card, PM Poshan Abhiyan, Har Ghar Jal – Jal Jeevan Mission, SVAMITVA, Jan Dhan Yojana, Jeevan Jyoti Bima Yojana, Suraksha Bima Yojana, Atal Pension Yojana, PM PRANAM leh Nano Fertilizer chung- changah zirtirna pek a ni a. Khaw hrang hrangah heng scheme kal- puitu Line department-a thawktu ten scheme chungchang mipui hrilhfiahin scheme a inziakluh duh tan hun hawn niin a hmuna scheme thenkhat tihhlawhtlin theih te chu tih nghal zel a ni bawk.