South Africa in a vawikhatna atan Ultimate Fighting Champion an nei a. Dricus Du Plessis chuan middleweight champion lai Sean Strickland hnehin champion kawnghren a chhuhsak.
Pathianni zinga Toronto khawpuia UFC 297 main event-ah Du Plessis hian a khingpui hi bout hmuhnawmah 48-47, 47-48, 48-47 in split decision in a hneh a. Fighter pahnihte inkara inthlauhna tlemte awm chu a vanneihpui ta zawk.
- An inthlau lo
Champion lai Strickland-a’n round hmasa pahnihah ding chunga kut inthlakah a khingpui lakah a che fuh ngun zawk a. Du Plessis-a’n inven a harsat.
Round thumna leh li naah erawh South African fighter a insiamtha a, a khingpui mitko veilam a hnek kak bakah a kut dinglamin chiang taka hnek fuhin a talbuai viau.
Round hnuhnung berah Strickland-a’n a tawp khar chhe lo mahse Du Plessis-a’n point a hmuh hnem zawkna turin a khingpui kut a thlak tha hman zawk a. A chak phah.
“Champion thar a awm tih an puan khan kum 15 chhung ka beihna, ka lo suangtuahna te a tak ram a thleng niin ka ngai a, ka tan chuan thil duhawm tak a ni.”
“A hnek a dik a, a na bawk. Lungin tu emaw in a rawn chhu fuh leh thin che ang hi a ni deuh ber. A thiam hle.” tiin a khingpui chu a fak ve bawk.
Bout dangah Women’s bantamweight title champion hlui Amanda Nunes in a chhuahsan tak inchuhnaah Raquel Pennington a hlawhtling a. Unanimous decision in Mayra Bueno Silva a hneh a. Kum 2018 a a lo chuh hlawhtlin tawh loh champion kawnghren a hreng.