Aizawl: Mizoram sorkar enkawl zirna ina zirtirtu indaih lohna awm thin tiziaawm turin education department-in zirtirtu sem rual a kalpui dawn.
ZPM kaihhruai sorkarin education policy mumal tak duan sa a nei a, hei hi a tahtawlin an kalpui chhoh dawn a. School Education Minister Dr Vanlalthlana’n zirtirtu sem rual an kalpui dawn tih amah kawmtu chanchinbu mi thenkhat a hrilh a, “Fel fai takin zirtirtu sem rual kalpui tum a ni a, rules awm sa hi siam that a ni ang,” a ti.
Education minister chuan academic session thar atangin zirna kawngah thil danglam deuh hmuh tur a awm dawn tih a sawi a, lehkhabu lei kawngah awmze nei zawka kal dan tur an ruahman tawh thu te, Samagra hnuaia kalpui tur pilot project-ah intodelh zirtir lam hawi kalpui a ni dawn tih a sawi.
Socio Economic Development Programme (SEDP) hnuaia zirtirtu sang khat chuang bân an nih tur chungchang zawhna pawh chhangin, “March thla chanve thleng hi chhawr tur an ni a, an aiawh tur hi kan ngaihtuah dawn a, hemi mi sang rualte hi chawl mah se harsatna awm lo turin ruahmanna kan nei tawh,” a ti.
SEDP hnuaia zirtirtu chu education department lak a nih loh thu leh an hlawh pawh an khawih lo tih sawiin, heti chung hian hlawh pek an nih loh chungchangah department demna pawh a awm tih a sawi a; an kut ni lo mah se an harsatnate hriatthiampuiin an hlawh tur an dilsak dawn a, hun rei vak lo hnuah chuan heng mite hian an hlawh an hmuh an beisei pui tih a sawi.
Zirtirtuten ai kal an lak chungchang zawhna pawh chhangin Mizoram sorkarin ai kal lak chu a ngai thu tak a, titawp turin hma a lak thu a sawi a, sorkar hnuaia thawk zirtirtu ai kal laa hna dang thawkte chu an hna ngaiah an let leh vek dawn a, an thawk chhunzawm duh lo a nih chuan an hna atangin an bânte pawh a ngai dawn tih a sawi a; hetihlai hian damlohna thil avanga loh theih loha aikal lak ngei, hriatthiam tul te erawh an awm tih a sawi bawk a ni.