- Ruata
Hero MotoCorp chuan an bike changkang ber tura ngaih theih, premium two wheeler huanga mi tur Mavrick 440 an phochhuak a, a man tur pawh an puanzar thuai beisei a ni.
Mavrick 440 hi book duh tan February thla atang hian a book theih beisei a ni a. A man tur puanzar in a zui ang a, April thla atang hian lei theih tura an tlangzarh fel chhoh beisei a ni. He bike hi Hero bike chhuak tawh zinga a changkang ber pawl tur a nih bakah bike changkang leh khawvel huap pawha lar Triumph leh adangte pawh el tura duan a ni a. Triumph Speed 400 nen an inel deuh ber beisei a ni.
Kan hriat theuh tawh angin Hero hi Harley Davidson nen an thawk dun mek a ni a. Hei pawh hi an thawhdunna hnuaia Hero hming pua chhuak tur a ni a. A hmain an thawhdunna hnuaiah tho Harley Davidson chuan X440 an lo tichhuak tawh a. He bike nen hian a platform, a khawl bakah thil hrang hrang a intawm dawn a ni.
- Chi hrang leh a rawng
Hero Mavrick hi variant 3 duhthlan tur a awm ang a, rawng chi 5 duhthlan tur a awm dawn bawk a. Heng a rawng tur te hi variant a hran angin a danglam ve zel dawn a. A man tlawm ber, base variant hi Arctic White rawng a ni ang a, a laihawl, mid-variant hi Celestial Blue leh Fearless Red a awm thung ang a, a man to ber, top-end variant hi Enigma Black leh Phantom Black paint scheme te duhthlan tur a awm thung dawn a ni.
- Design
A hmalamah chuan LED projector headlight bial kan hmu a, H shaped DRL a nei bawk a. A fuel tank hi a design a ki tha viau a, MAVRICK insignia kan hmu bawk a. Harley X440 nena khaikhinin Mavrick hian handle bar a nei hniam a, footpeg pawh a awmna a lai deuh a. A khalhtu position pawh an thu tung deuh bawk a ni.
- A khawl leh thildang
Hero Mavrick hian Harley-Davidson X440 nen khawl inang an hmang a. 440cc, single-cylinder, air-cooled khawl niin 27.3PS power chu 6,000rpm-ah a pechhuak a, 36Nm torque chu 4,000rpm-ah a pechhuak bawk a ni. Hero chuan a torque zaa 90 hi 2000rpm chinah a pechhuak hman niin an sawi a. 6-speed gearbox with slip-and-assist clutch a hmang bawk a ni.
Suspension lamah chuan a hmalamah 43mm telescopic fork leh a hnunglamah dual shocker te kan hmu a. 130mm wheel travel neiin a rihzawng, kerb weight hi kg 187 a ni. A khan san zawng, ground clearance hi 175mm a ni a. A hnung leh hmaah 17-inch wheel a hmang bawk a ni.
A man tlawm berah hian spoked wheel kan hmu a, a mid variant-ah alloy wheel leh top variant-ah diamond-cut alloy a hmang bawk a ni. A kentel zingah hian negative display LCD speedometer, smartphone features hrang hrang – phone battery status, incoming call/missed call alert bakah turn-by-turn navigation, RTM, DTE, leh gear indicator te a awm bawk a ni.
Hero Mavrick hi Hero Premia dealer network atanga hralhchhuah tur a ni a. Tunah hian hetiang showroom hi company hian 3 chauh an nei rih a, kumin June thlaah hian hetiang dealership hi 100 neih hman tumin ruahmanna an siam mek a ni.