Eptu tangrual, INDIA chuan darkar reilo te danah thil pawi lian tak an tawk a. Aam Aadmi Party (AAP)-in Lok Sabha inthlan lo awm turah Punjab-ah anmahnia an chuh tur thu an puang a, hjemi hma lawk hian Trinamool chief Mamata Banerjee chuan West Bengal-ah Congress nen an thawhho dawn loh thu a sawi bawk.
“AAP hian bial 13-a ding thei tur mi 40 an thliar sin tawh a. A ding tak tak tur tihchian hmain thlir zel a ni ang,” tiin Punjab Chief Minister Bhagwant Mann chuan Nilaini khan a sawi.
A hma lawkin Banerjee-i’n an state-ah Congress nen thawhhona tur engmah an siam loh thu a lo sawi tawh a, inthlan zawhah ram pum huapa thawhho dan tur pawh sawiho tur a la nih thu a sawi bawk.
“Congress nen kan sawiho lo va. Ka lo sawi fo tawh angin Bengal-ah chuan a malin kan bei ang. Congress hnenah rawtna ka thlen tawh a; mahse, an hnar a. A bak ram pum thil chu kan la ngaihtuah lo va. Tih bik nei lo party kan ni a, Bengal-ah chuan keimahniin BJP hi kan hneh ang,” a ti.
Congress hian Banerjee-i leh Mann-a thu sawi hi an la chhang lo.
Trinamool leh AAP ten a mala inthlan chuh an tum thu an puan rual hian INDIA-ah Congress leh regional party inkar inpawhna a awm thin nia sawi chu a rik rin thar phah.
Regional party lian, a bik takin Trinamool, AAP leh Samajwadi Party te chuan an chakna mualah chuan kaihruaitu ber nih an duh thu an lo sawi tawh hlawm a, Congress hi ram puma a lian an ni thung a, hei hian state mala bial inchan sem a tibuai phah a ni.
Bengal leh Punjab-ah te hian Congress leh rorel lai party hi INDIA thutkhawmah inpumkhat angin insawi mah se an inbei nasa hle a. Bengal Congress unit hruaitu, Adhir Ranjan Chowdhury leh Punjab hruaitu, Amarinder Raja Singh Warring te hian an state-a tanho chu an duh lo ve ve a ni.
Thla tir lamah khan Warring hian an party hotu lian atangin AAP nena thawkho turin eng thu mah an la hmuh loh thu a lo sawi tawh a. Hei vang hian Congress chuan Punjab-ah hian bial 13 chuh turin an inbuatsaih tih a sawi.
Punjab-ah hian AAP leh Congress hi INDIA-ah chuan an inkar khi nasa an ni a. June thlaa Patna-a INDIA thutkhawmah pawh khan Congress leh AAP hi an inmil lo hle tawh bawk.
Hetih hun lai hian AAP hian Congress chu sorkar laipuiin Delhi officer a thunun dodal turin an duh a. Grand old party hian hemi chungchangah hian dinna nghet an nei lo va, parliament-ah hemi chungchang bill hi a tlang ta nghe nghe.