India ram Prime Minister Narendra Modi-an thla tinin All India Radio kal tlanga ram mipuite hnena thuchah a puan ruala ram chhung hmun hrang hranga thiltih leh hmalakna chawimawi tlak leh entawn tlak a sawi lanna hun Mann Ki Baat-ah Mizoram atanga tarlan awmchhun ni rih pahnih zinga mi — Khawlailung khuain an fu chinte atanga kurtai an siamchhuah buaipuitu, khatih hunlaia MP (Lok Sabha) C. L. Ruala te nupa leh Aizawl khawpui tana lui hmingthang leh chhenfakawm Chite Lui chhanchhuak tur leh humhalh tura beitu Save Chite Lui Coordination Committee-a an General Secretary Rochamliana te nupa chu kumin January 26, 2024-a ram zalenna vawi 75-na (Republic Day) lawmna pui ber, New Delhi-a Kartvya Path-a neih turin a hmun ngeia tel ve tura sawm an ni.
Delhi-a Republic Day hmang tura an kal chhungin kawng engkim a anmahni lo buaipui tur leh ‘sawm bik’ (dignitaries) an nihna anga a bik taka lo enkawl turin Ministry of Information & Broadcasting chu ruat an ni bawk.
Republic Day Vawi 75-na lawmna hun bakah I&B Minister Anurag Singh Thakur leh Minister of State Dr. L. Murugan te nena thingpui inhona hunah tel tura sawm an ni nghal bawk a ni.