Vawiin Australian Open hmeichhe singles final-ah champion lai Aryna Sabalenka kuta title chhuhsak tumin Chinese nula Qinwen Zheng chuan khelmual a lut dawn a, Li Na dawta Chinese zinga Australian Open title hawn leh thei hmasaber ni zo tak ang maw?
Belarusian Sabalenka hma hian a chipui Victoria Azarenka chuan kum 2012 leh 2013 khan a major title a lo humhim tawh a, Rod Laver Arena-ah hian Azarenka hnungzuiin a title humhim a tum ve dawn a ni.
Kum 25 mi Sabalenka hi Serena Williams hnu lama final lut zawn leh thei hmasaber niin, American great hnungzuitu hian major tournament a khelh hnuhnung parukah semi-final leh a chunglam a la thleng ziah a ni.
Nikum khan Melbourne Park-ah hian a grand slam title hmasaber hlawhchhuakin, nikum vek khan U.S. Open final a lut leh a, American tleirawl Coco Gauff a hneh lo a; Australian Open semi-final pakhat zawkah Sabalenka hian Flushing Meadows-a a tlawmna phuba lain Ningani khan Coco hi 7-6(2), 6-4-in a hneh a, a title kawl lai humhim thei turin match khat a la hmabak.
Semi-final lehlamah Zheng Qinwen chuan Ukrainian Dayana Yastremska lakah 6-4, 6-4 hnehna a chang ve bawk a, a vawikhatna atan Grand Slam final a khel dawn.