Boeing chuan engine pahnih (twin-engine) hmang thlawhna, 777X chu a vawi khat nan nimin khan hlawhtling takin an thlawh chhintir.
Boeing hian an thlawhna chhuanvawr, 737 Max chu nikumah vawi hnih lian tham tak taka chesuala mi 346 zet an thih hnuah a dintir hlawm a. Tuna thlawhna thar hi nakin lawkah chuan a thlaktu tur a nih a rinawm.
Thlawhna thar enchhinna hi Seattle bulah neih niin darkar 4 lai a thlawk kual a. Kar kalta chhung khan vawi hnih enchhin hi tum tawh a ni a; mahse, thli tam lutuk avangin an thulh.
Nakumah Emirates chuan thlawhna hi service-tir an tum a, hemi hma hian vawi eng emaw zat an enchhin leh phawt ang.
Feet 252 zeta sei passenger plane hi kumin chhunga tlangzarh hman tum a ni a; mahse, technical lamah harsatna neuh neuh a awm avangin an sawn hla leh rih.
777X hi Boeing-in an siam chhuah thlawhna lar tak, 777 mini-jumbo aia lian leh rintlak zawk tura ngaih a ni a. A thuamna thar zingah wingtip leh khawvela commercial engine lian ber nei tur a ni.
777X marketing director Wendy Sowers chuan, “Company tana kan tihsak theih lian ber a ni,” tiin a sawi a. Boeing chuan thlawhna hi 309 an hralh tawh a, chu chu $ mtd 442 man vel a ni a. Mi 360 phur thei, Airbus A350-1000 nena khaikhin chhoh tur a ni ang.
Boeing hi 737 Max a tlak zawn hnu lawkah an buai tan a. A tla hmasa zawk hi Indonesia-ah October, 2018-ah tlain Ethiopia-ah March-ah a tla zui bawk.
Hemi hnuah hian nasa taka chhui a ni a, mi tam takin a himna lamah an ringhlel a, airline tam takin jet lam an awn phah a. Hei vang hian an tang hle a ni.
Boeing-in thlawhna an siam chhuah tawh zinga an hralh tam ber, 737 Max hi an din vek a, an hralhna man hi $ tld 9 lai a tling hman a. Ngun taka chhuiin thlawhna thar hi an puah ta a ni.